O Concello anuncia multas de entre 200 e 3.000 euros para quen non cumpra
22 feb 2020 . Actualizado ás 18:15 h.A alcaldesa, Inés Rey , anunciara a súa intención de acabar a curto prazo co botellón nos xardíns de Méndez Núñez, e xa lle puxo data límite a esa actividade: desde o xoves non haberá alí máis concentracións de persoas.
A ferramenta legal para facelo será a catalogación de todo esa contorna como zona de especial protección (ZEP), medida que se aprobará o mércores en xunta de goberno local e que se publicará o xoves no BOP, momento en que entrará en vigor.
En esencia, a zona ZEP impide o «uso abusivo do espazo público» e a concentración de persoas que perturben o descanso público de dez da noite a oito da mañá.
A aprobación da norma levará aparelladas dúas medidas: unha delas será a sinalización das restricións nese espazo, e a segunda será a presenza policial para vixiar que se cumpra o aprobado. Con ese fin, indicou onte Inés Rey , desde mañá mesmo haberá vixilancia policial nos xardíns de Méndez Núñez para impedir alí que se produzan novos botellóns. A vixilancia manterase no tempo para impedir que esa actividade se volva a retomar.
«Unha das preocupacións do goberno local é a recuperación de espazos públicos e a posta en valor dos mesmos para uso e goce dos cidadáns», dixo Rey . A outra preocupación é o abuso do alcol por parte de menores de idade. A ambos os asuntos farase fronte nos xardíns. Para quen non cumpra, a alcaldesa anunciou sancións que van desde os 200 euros nos casos leves aos 3.000 euros nos máis graves. As cantidades subirán en caso de reiteración.
Inés Rey ten a intención de «frear a constante deterioración dos xardíns» e avanzou xa que están a traballar nun plan para devolverlles o seu antigo esplendor. A demarcación como ZEP é só o primeiro paso dun obxectivo máis ambicioso: a declaración dos históricos xardíns —os segundos en antigüidade na cidade tras San— Carlos como ben de interese cultural (BIC).
Os veciños do Orzán xa expresaron a súa preocupación ante esa prohibición. Temen que os mozos que se despracen dos xardíns acaben facendo botellón nas rúas do barrio e dificultando aínda máis o descanso nesas zonas. Con respecto a esa posibilidade, Rey indicou que «desde xuño o número de actuacións policiais é inxente» nesa zona no control do lecer nocturno, e lembrou que na Coruña existe unha ordenanza para regular a convivencia e a súa intención é cumprila.
Máis dun decenio
O botellón leva desde o 2008 instalado nos xardíns, onde a sucidade e as desfeitas forman parte do panorama habitual nos amenceres dos venres e os domingos. As concentracións repítense regularmente os xoves e os sábados. As medidas postas en marcha ata agora non deron resultados. Durante o pasado mandato enviáronse monitores e puxéronse colectores, e ata se sortearon premios entre os que recollesen o lixo. Non funcionou, e o botellón seguiu deixando un panorama desolador nos históricos xardíns.
A declaración de espazos como ZEP xa se aplicou antes na praza do Humor, Santa Catalina e a Cidade Vella. Neses casos, tras constantes queixas dos veciños, conseguiuse que o botellón se fose aos xardíns.
Un milleiro de participantes e tres toneladas de lixo recollidas cada mañá
Na declaración de zona de especial protección inclúense informes de distintos departamentos. «No mellor dos casos, os niveis [sonoros] no exterior que xeran este tipo de actividades roldan os 80 decibeis, superando en todos os casos os obxectivos de calidade acústica aplicables aos sectores do territorio de natureza residencial», indica o informe de Medio Ambiente.
«A pesar da presión policial o botellón non desaparece», indica pola súa banda a Policía Local, que constata que a afluencia habitual a esas citas é dunhas mil presentas e apunta que as infraccións máis comunmente detectadas son ouriñar na vía pública, vandalismo e pelexas, e consumo de alcol por menores. «Desde a Policía Local proponse que se adopten medidas paliativas para limitar estas condutas negativas para a saúde dos mozos nun espazo público tan emblemático», indica o texto do 092.
Tamén se encargou un informe ao enxeñeiro agrónomo Pedro Calaza. «O uso masivo e concentrado, así como inapropiado, por parte dun sector moi específico da poboación, está provocando a perda global dun espazo histórico da cidade», indica Calaza, que chama a continuar co proceso para declarar BIC esa zona.
Tamén Cespa, a empresa de limpeza viaria, remite un documento ilustrado con numerosas fotografías que evidencian os danos que se topan os operarios cada mañá. Inés Rey lembrou que dos xardíns se retiran, tras cada botellón, preto de tres toneladas de lixo repartidas polo emblemático espazo.