Morre unha muller ao estrelarse un coche contra a cabina de peaxe de Guísamo
A Coruña CIDADE
Unha empregada do posto de pagamento da AP-9 foi evacuada con feridas graves
18 ene 2020 . Actualizado ás 18:38 h.Unha muller de 58 anos que viaxaba como copiloto nun vehículo que percorría o traxecto da AP-9 desde Ferrol en dirección á Coruña faleceu este sábado tras impactar o coche no que ía contra unha das cabinas da autoestrada no lugar de Guísamo (Bergondo).
O accidente produciuse ás 11.31 horas e todo apunta a que o vehículo envorcou antes de chocar contra a estrutura, provocando o luctuoso sinistro. Ademais do falecemento da muller, resultou con feridas graves a traballadora de Audasa que se atopaba nese momento na cabina de pagamento. Foi evacauda nunha ambulancia medicalizada ao Hospital A Coruña mentres que o condutor do coche, que saíu polo seu propio pé, acudiu ao mesmo centro noutra ambulancia.
Ao lugar acudiron os bombeiros de Betanzos , encargados de excarcerlar á vítima mortal, e membros de Protección Civil de Bergondo, entre outros.
A Garda Civil investiga as circunstancias do accidente e non se descarta que se producise tras un volantazo do condutor para corrixir a súa traxectoria e entrar no carril da cabina de peaxe.