A demora media para pasar polo quirófano é de 63,8 días e a de primeiras consultas 35, seis menos que hai un ano. En probas, as endoscopias tardan cinco meses e os TAC, dous
17 ene 2020 . Actualizado ás 19:12 h.Segundo os datos facilitados este venres polo Sergas, o tempo medio para ser operado na área sanitaria da Coruña reduciuse en cinco días no último ano, ao pasar de 69,3 días no 2018 a 63,8. Aínda así, os coruñeses tardan nove días máis que a media dos galegos en pasar polo quirófano, diferenza que se vincula ao tamaño da demarcación, unha das máis grandes e poboadas da comunidade que depende de un hospital de alta complexidade.
En función da gravidade das patoloxías, no Chuac os pacientes de prioridade 1 (operacións oncolóxicas, con compromiso vital ou de rápido empeoramento) tardan agora 15,1 días en ser intervidos fronte aos 20,1 do 2019, por baixo do obxectivo establecido dun mes. Tamén descendeu a demora en prioridade 2 (enfermos que han de pasar polo quirófano antes de 6 meses), que segundo os datos oficiais sitúase nunha media de 55,7 e hai un ano era de 58,1. No ámbito cirúrxico, descendeu ademais a espera para os enfermos de prioridade 3, que son operados en 68,4 días, 6,7 menos que no 2018.
«Estamos moi satisfeitos, moito», subliñou Antón Fernández, director médico do Chuac, quen valorou que «son os mellores datos da historia da área sanitaria e foron posibles grazas ao traballo e esforzo de todos os profesionais; somos unha área grande, cunha gran demanda asistencial e sen o compromiso dos profesionais de atención primaria e especializada, de todos, non sería posible», insistiu.
Son os mellores datos da historia da área sanitaria e foron posibles grazas ao esforzo e compromiso de todos os profesionais
Á marxe da redución da espera, resaltou a importancia que ten o balance asistencial «polo que supuxo a lei de garantías en cirurxías oncolóxicas, que nos permitiu ser máis eficientes». A mellora, sinalou Fernández, prodúcese ademais nun ano no que «aumentamos bastante a actividade», xa que ao longo do 2019 levaron a cabo 2.618 intervencións máis que no 2018, ata chegar ás 38.512, cun incremento de tres décimas no rendemento cirúrxico, que se sitúa no 74,7. A subida produciuse tamén no Hospital de Cee, onde se realizaron 3.688 operacións, 331 (case un 10 %) máis que o exercicio anterior.
Mellor que a media galega en consultas
Aínda que «o dato máis rechamante é a redución da espera en cirurxía», o director médico recalcou tamén as cifras relativas ás consultas externas, xa que o tempo medio para ser atendido en primeira consulta polo especialista baixou de 41,4 a 35 días nun período no que o número de citas subiu en 6.000 ata chegar a un total de 741.263. Do mesmo xeito que no campo cirúrxico, tamén neste apartado produciuse unha alza no Virxe da Xunqueira, que atendeu un milleiro máis de primeiras consultas durante o 2019. En visitas clínicas, os coruñeses melloran a media do resto dos galegos, onde a primeira cita para ver ao especialista tarda 41,5 días.
En vías rápidas, unha semana
Os números son mellores, engadiu Fernández, se se atende á asistencia nas denominadas vías rápidas, cun tempo medio de acceso de 7,8 días cando o obxectivo era que baixa de 15. Así, a vía rápida de cancro de pulmón obtivo uns rexistros de 5 días, a de mama 8, en colon foi de 6,4, para tumores de próstata estivo en 10, 9,8 en vexiga, cabeza e pescozo 7,3, melanoma 6,5, oncohematología 8,5 e a dela 5,5.
