Foi visto por última vez cando faenaba na zona denominada O Fondón, entre Corme e Sisargas
16 ene 2020 . Actualizado ás 05:00 h.Con gran preocupación vivíase hai 47 anos a desaparición do Liraña, unha embarcación que anunciara a súa inminente chegada ao porto da Coruña para descargar as capturas, pero que nunca chegou. Foi visto por última vez cando faenaba na zona denominada O Fondón, entre Corme e Sisargas. Nese lugar comezou a procura, que a medida que pasaban os días foise estendendo coa participación de buques da Armada, pero sen resultados.
Un veciño de Corrubedo, Ramón Martínez Mariño, era o patrón de costa e tamén o armador do buque, que tiña a súa base na Coruña. Ademais, entre os dez tripulantes do pesqueiro había un boirense, un sonense e un noiés.
Non foi ata que pasaron 17 días da desaparición cando se tiveron as primeiras noticias do Liraña, que chegaron co achado dunha balsa pechada preto de San Vicente de la Barquera. Xornadas despois foi atopada outra balsa na costa de Asturias. E o 23 de febreiro, un pesqueiro con base en Ferrol descubriu o cadáver dun dos mariñeiros desaparecidos á altura de Corme.
Ante a falta de máis noticias, o 22 de maio de 1973, o Liraña foi dado oficialmente por afundido.