«Por moito que diga a Consellería de Sanidade, a realidade é teimuda e vese acotío a sobrecarga asistencial», aseguran os traballadores
17 ene 2020 . Actualizado ás 12:17 h.Persoal dos centros de saúde da área coruñesa volveu este xoves a concentrarse en protesta polas condicións laborais e para reclamar máis recursos humanos. «A Atención Primaria vai continuar con mobilizacións e demandando solucións», subliñaron portavoces das Asembleas de Área, xa que «por moito que diga a Consellería de Sanidade que está executado o 99 % do 'seu' plan , ou por moito que digan da Xerencia de A Coruña que as 'demoras en atención primaria son puntuais', a realidade é teimuda e vese acotío a sobrecarga asistencial e as listas de espera».
Os traballadores repetiron unha protesta que veñen protagonizando semanalmente desde hai meses e á que están chamados médicos de familia, pediatras, odontólogos, farmacéuticos, internos e técnicos sanitarios para esixir a cobertura de todas as vacantes por oposición e a creación de novas prazas «para poder prestar unha asistencia de calidade». Reclaman ademais que se incrementen os fondos destinados a Atención Primaria ata acadar o 25 % do orzamento sanitario, a creación de xerencias propias, e o establecemento de «contratos dignos» para os eventuais.
Segundo subliñan, a sobrecarga que xa viñan soportando habitualmente por contar cun persoal «totalmente insuficiente», aseguran, viuse agravada nos últimos días a consecuencias do aumento de pacientes afectados pola gripe e demais complicacións habituais na tempada invernal.