A asociación coruñesa ABAC inicia unha campaña para reclamar unha normativa que regule os contidos dixitais sobre os trastornos da conduca alimentaria
14 ene 2020 . Actualizado ás 14:05 h.A Asociación de Bulimia e Anorexia da Coruña (ABAC) iniciará unha recollida de firmas reivindicando unha normativa que actúe contra as páxinas web que fan apología dos trastornos da conduta alimentaria, lexislación actualmente inexistente. A campaña, que se desenvolverá baixo o lema Por un mundo sen Ana e Miña impúlsase coincidindo con o 16 de xaneiro, data elixida polas páxinas Pro -anorexia e Pro -bulimia para celebrar a incidencia e prevalencia destes trastornos da conduta alimentaria (TCA).
ABAC lembra que «os espazos que fan apología dos TCA supoñen un grave perigo para a mocidade, especialmente do sexo feminino», xa que a maioría das persoas que os frecuentan son mozas (95 %), menores de idade (78 %) e persoas que se atopan na fase inicial do seu trastorno (70 %).
Os máis coñecidos son as páxinas Pro -ANA (anorexia) e Pro -MIÑA (bulimia), as cales «fomentan métodos inadecuados para perder peso e exaltan modelos de extrema delgadez, definindo a anorexia e a bulimia como un estilo de vida», indica a asociación coruñesa, que constatou que entre o 2006 e o 2011, o número destas webs «aumentou un 470 %».
Algunhas das prácticas que promoven e levan a cabo para adelgazar son as denominadas carreiras de quilos, o consumo de fármacos sen supervisión médica, as dietas restritivas e os autocastigos. «Todas carecen de fundamento científico, ademais de pór en risco a súa saúde física e mental», alerta o colectivo.
A pesar diso, actualmente en España «non existe unha normativa que sancione esta clase de contidos a nivel nacional», lamenta a asociación, polo que ABAC decidiuse a realizar unha recollida de firmas a través da plataforma Change.org, co obxectivo de «conseguir a repercusión necesaria para que as autoridades competentes acaben con este tipo de páxinas».