Pablo Castiñeira, de 11 anos e alumno de Santa María del Mar, actúa este martes no programa de talentos infantís de Antena 3
15 oct 2019 . Actualizado ás 05:00 h.En 1990 Prince actuou en Santa María del Mar. Un concerto irrepetible pero que deixou unha semente musical neste centro educativo. Porque por segunda vez en pouco tempo un alumno do colexio dos xesuítas participa no programa La Voz Kids. Pablo CastiñeiraDíaz , de 11 anos e que cursa 6.º de primaria, foi seleccionado nun casting ao que se presentaron 6.000 rapaces de toda España. Esta noite será o segundo en saír ao escenario, máis ou menos sobre as once menos cuarto da noite. «Os coaches non dan crédito: un pequeno e roquero talent revoluciona o estudio de La Voz Kids», avanzan na web oficial de Antena 3.
Pablo interpretará con gran desenvoltura un tema de Guns N' Roses. «Gústalle o rock e encántalle cantar. O seu pai tamén canta moi ben. Tamén toca instrumentos de oído. Recordo que o levamos a ver A A Land e tres días despois xa tocaba a melodía no teclado de Imaginarium», comenta Paula, a nai deste artista da inesgotable canteira de Santa María del Mar.
Pablo toma a vez de Lucía Peñamaría, que fai un par de anos cegou co seu talento no mesmo concurso.
«Pelusa», o libro de Nati
Nati Souto presentou na escola Abelliñas de Oleiros, onde traballa como educadora, o seu primeiro libro infantil, «Pelusa»
Nati Souto é educadora infantil e, agora, escritora infantil. Nas últimas horas presentou na escola infantil na que traballa un libro titulado Pelusa (Círculo Rojo , editorial). «Transmite valores, respecto, emoción... E por iso todos a animamos a que o publicase», destaca Cristina García Muíño, directora da escola Abelliñas, de Oleiros, situada preto da Casa do Concello e do restaurante O Refuxio. Nati ten 27 anos e fálanos dunha Pelusa que «vive tranquila debaixo dun sofá, ata que un día algo lle fai cambiar a súa forma de entender as cousas para… sempre É un conto que fala da soidade, da superación dos nosos medos e da alegría acadada ao atopar o noso lugar no mundo», explica a autora. Á presentación acudiron cantidade de persoas vinculadas ao centro educativo. Xa quedan poucos dos primeiros 200 exemplares. «É un conto infantil, pero, teña a idade que teña o lector, identifícasche con Pelusa nalgún momento da túa vida», aseguran.