O mal aparcadoiro sobrevive en rúas do Agra, os Mallos, Catro Camiños, Xulgados, Riazor, A Gaiteira ou Monte Alto
12 oct 2019 . Actualizado ás 05:00 h.A campaña contra a dobre fila e o mal aparcadoiro non será flor dun día. A alcaldesa xa adiantou onte que durante todo o seu mandato non se baixará a garda. A circulación e a fluidez do tráfico, os principais inimigos do mal estacionamento, é unha das prioridades do Goberno local. Así o adiantou onte a alcaldesa, Inés Rey , no programa Voces da Coruña de Radio Voz. Pediu «paciencia e comprensión» por non chegar a todos os sitios, xa que se trata dunha campaña que vai durar no tempo, que se executará de forma constante ao longo de todo o mandato».
En canto ao balance de multas, a rexedora, que visitou a sala de pantallas, recoñeceu que «aínda» non dispoñen de datos «porque apenas levamos cinco días. Pero a iniciativa xa comezou a dar os seus froitos nas zonas que estaban máis saturadas como podían ser a contorna da praza de Lugo, a rúa de Juan Flórez... Xa se nota que se liberou esa dobre fila. Que se pode circular por todos os carrís habilitados».
Por iso aproveitou para agradecer o labor desempeñado polos axentes da Policía Local. No entanto lembrou que «aínda hai zonas problemáticas, como Oidor Gregorio Tovar, Capitán Juan Varela e toda a contorna dos xulgados, que, sobre todo polas mañás, teñen moita afluencia de xente». Son lugares nos que non hai cámaras e os axentes do 092 non dan abasto.
Hai barrios que están aínda sen xeito nin modo. Hai rúas, como a de Alcalde Lens, no Agra, que non hai sitio nin en dobre fila. Todo o longo da rúa está ocupada. A rúa Posse, sen ser tan caótica tamén é outra onde a dobre fila e o aparcadoiro na mediana é algo habitual. Como a avenida do Exército, á altura do cruzamento con Ramón e Cajal. Ou a rúa que corre paralela a San Cristóbal.
O caso do home que tiña a súa praza «ilegal» reservada
A alcaldesa lembrou onte un caso que lle transmitiu o propio concelleiro de Mobilidade, Juan Díaz Villoslada. O edil, nunha das súas visitas ás zonas máis afectadas polo mal aparcadoiro, atopouse cun condutor que tiña a súa praza reservada en dobre fila. Xa non nun lugar correcto, senón nun ilegal. Cando se ía, deixaba un obstáculo. Cando regresaba co coche, quitábao e aparcaba el. E así durante meses. Ata que o cazaron.