Profesionais do Chuac da Unidade de Coidados Paliativos, Oncoloxía Pediátrica e voluntarios celebran o seu día mundial reivindicando o seu papel
12 oct 2019 . Actualizado ás 10:41 h.Coincidindo coa conmemoración do Día Mundial dos Coidados Paliativos, que se celebra este sábado, os profesionais sanitarios do Chuac que traballan nos coidados ao final da vida e voluntarios colaboradores sumáronse á campaña polo dereito aos «rignt care» impulsada pola International Association for Hospice a favor dos coidados correctos para unha despedida digna. Fixérono fotografándose nunha postal, que ademais lembra os 23 anos da unidade do Sanatorio de Oza, como imaxe para «visibilizar, sensibilizar e dar a coñecer as necesidades de coidados paliativos a nivel poboacional», explicou Juan Sanmartín, responsable do equipo do Chuac.
O día mundial, no que se aproveita para dar a coñecer as cifras sobre a falta de cobertura, as dificultades de acceso á morfina nalgúns países ou a inexistencia de coidados paliativos pediátricos, céntrase en promover actividades, desde conferencias ou xornadas, nas que tamén se difunden os labores que levan a cabos as unidades especializadas.
No caso da unidade coruñesa, «vimos dun éxito relevante co terceiro Fórum multidisciplinar», celebrado recentemente e no que se trataron «temas transcendentais e de avances significativos», lembrou o especialista. Coa foto-postal «queriamos manifestar a nosa intención de promover actividades de integración con outras unidades e outros servizos, e unirnos todos para que a nivel comunitario poidamos REVISAR atender as necesidedades paliativas da poboación da área coruñesa», sinalou.
Así, xunto a médicos e enfermeiras da Unidade de Coidados Paliativos, retratouse a sección de Oncoloxía pediátrica de materno Hospital Teresa Herrera, o asesor espiritual e voluntarios que apoian ao equipo no hospital de Oza.
A unidade traballa xa en novas iniciativas, como pór en marcha, a partir do mes que vén, o taller Arte e Emocións para os enfermos ingresados, para o que o persoal e os familiares seguiron un programa de formación, e tamén incorporar o apoio da Asociación Española contra o Cancro, que acompañará polas tardes ás familias e porá en marcha o Café Care, a repartición de café entre quen están cos seus seres queridos no hospital. «Os paliativos tamén existen e facemos righ care», salienta Sanmartín.