O barítono coruñés inaugurou en Espazo Coruña, xunto coa súa muller, a profesora e bailarina Vernónica Torres, a escola de artes O Laboratorio
20 sep 2019 . Actualizado ás 07:58 h.«É o típico soño que anos atrás comentas en plan broma e que un día se fai realidade», reflexiona o prestixioso barítono coruñés Borja Quiza. Ese soño de mocidade chámase O Laboratorio e ocupa unha superficie de 500 metros cadrados no centro comercial Espazo Coruña «Está perfectamente insonorizado porque vai ser a sede da orquestra e os coros Gaos. Imaxínache noventa músicos tocando cos cines amais se non coidamos eses detalles», apunta pouco antes da inauguración desta iniciativa empresarial e artística. «É unha escola de arte multidisciplinar. Ofrece a educación complementaria que queremos para os nosos fillos. Xa contabamos coa escola Galemúsica pero quedábasenos pequena», destaca. Música, danza, teatro, artes plásticas, fotografía... «Ata dispomos dunha consulta onde unha vez á semana virá un nutricionista ou un acupuntor. Instalamos tres cabinas de estudo para instrumentistas, vestiarios... É para nenos ou para adultos», resume Borja, que leva meses dándolle forma a este soño de 500 metros cadrados. Onte pola tarde inaugurou xunto á súa muller, a profesora e bailarina Verónica Torres, esta nova proposta. «Somos inquedos», confesa. Houbo música en directo e ata o propio Borja animouse cun par de pezas. «Temos unha páxina web con toda a información ellaboratorio.art e as clases iniciámolas o 1 de outubro», avanza.