O Concello inicia o expediente pola obra sen licenza da casa de Oza
A Coruña CIDADE
Unha empresa retiraba o martes as estadas e seguín con retoques na fachada do inmoble
27 ene 2022 . Actualizado ás 17:51 h.O Concello remitiu onte o informe policial pola obra levada a cabo na casa modernista de Oza aos departamentos con competencias na materia para que abran o expediente que dilucide a responsabilidade dos promotores, que estarían a actuar sen licenza nun inmoble con protección estrutural.
Onte mesmo a empresa que realizaba as actuacións retiraba estadas e seguía dando retoques na fachada, na carpintería exterior do edificio.
Desde o consistorio indican que os propietarios se enfrontan a unha sanción se finalmente se confirma que carecen de calquera permiso para actuar no inmoble. Desde o Concello afirman que non o teñen.
O edificio, declarado en estado de ruína hai anos, é un dos bens arquitectónicos máis valiosos do barrio dos Castros. Na ficha do plan xeral figura que é obra de Antonio López, datada en 1925. Con todo, o historiador local José Carlos Alonso, que tivo acceso ao expediente da vivenda, indica que a obra a asinou outro arquitecto, o madrileño Antonio de Mesa e Álvarez e que se rematou en 1919.
En calquera caso, o valor arquitectónico da construción é innegable, con calidade similar a moitos dos edificios protexidos da contorna da praza de Lugo e outros puntos do centro, coa excepción de que mentres alí abundan e moitos foron rehabilitados, o da avenida de Oza segue correndo o risco de caerse. O seu interior, con estrutura de madeira, está apontoado e hai meses declarouse alí un incendio sufocado polos bombeiros.