Desde a Concellaría de Medio Ambiente aseguran que seguen avaliando todas as posibilidades
03 ago 2019 . Actualizado ás 12:10 h.Na mañá do venres a concelleira de Medio Ambiente, Esther Fontán, declarou que aínda non existe ningún acordo pechado coas operadoras de tratamento de residuos sólidos urbanos.
Respecto da rebaixa proposta por Sogama , de 7,5 euros por tonelada, Fontán afirmou que «equivale ao transporte das toneladas de rexeitamentos acumuladas en Nostián e xa que logo consideramos que debe acordarse outra taxa que poida asumir o Concello». A isto engadiu que os residuos xa están tratados, polo que este sería un custo que Sogama se aforraría.
Para a concelleira este é un problema de futuro: «Debemos decidir e apostar por un modelo para os próximos anos, un modelo sostible que conte con todas as garantías técnicas e ambientais». Tras a advertencia da Xunta de posibles multas por un delito ambiental, o Concello enviou unha carta solicitando máis tempo e facilidades, con todo aínda non recibiron resposta e Fontán indica que non existe ningún prazo concreto outorgado polo goberno galego.