Un total de 712 parellas romperon e en 332 ocasións tiveron que acudir a un xuíz
22 jul 2019 . Actualizado ás 08:54 h.A provincia amence cada día con 8 parellas rotas. Estes son os últimos datos do Consello Xeral do Poder Xudicial, que destaca que no primeiro trimestre do ano producíronse 712 divorcios. Deles, 380 son consensuados ou de mutuo acordo e 332 non consensuados ou contenciosos. Isto supón un aumento significativo respecto de meses anteriores, pois entre xaneiro e marzo houbo un 36 % máis de rupturas matrimoniais que no mesmo período do ano anterior.
A Coruña foi a cidade da provincia con maior número de divorcios, pois se rexistraron 254, o que significa unha media de 2,8 cada día. Nas mesmas datas, rexistráronse 6 separacións. E en 46 ocasións os cónxuxes con fillos acadaron un acordo para a custodia, mentres que en 41 nons.
Despois da Coruña, onde máis matrimonios fracasaron no primeiro trimestre foi en Ferrol, onde se produciron 116 divorcios, dos que 61 foron de mutuo acordo. Sobre a custodia dos fillos houbo 29 casos, nos que a metade tivo que intervir o xuíz ante o desacordo de ambos os proxenitores.
En Santiago , no mesmo período, rexistráronse 91 divorcios. Apenas un ao día. En canto á custodia dos fillos, en 13 ocasións a decisión foi acordada entre os cónxuxes e 14 non o foi.
En Carballo romperon entre xaneiro e marzo 42 persoas. En 22 ocasións foi de mutuo acordo. O que si destaca neste municipio é o número de xuízos contenciosos para obter a custodia dos fillos, pois en nove ocasiones tivo que decidilo un xuíz ante a disputa dos pais. Só unha vez neste primeiro trimestre do ano houbo mutuo acordo neste aspecto.
Para rematar, en Ribeira producíronse 38 divorcios. 21 deles, non consensuados. Con todo, nesta comarca houbo menos conflitos á hora de decidir quen quedou coa custodia, pois 7 parellas acordárono sen ter que presentar demanda algunha, mentres que 4 acudiron aos tribunais.
Galicia
O número de demandas de ruptura matrimonial -separacións e divorcios- presentadas en Galicia no primeiro trimestre de 2019 situouse en 1.618, fronte ás 1.185 que se rexistraron no mesmo período do ano pasado, o que supón un aumento do 36,5 por cento, fronte ao 1,2 % de incremento de media estatal. O Tribunal Superior de Xustiza (TSXG) puntualiza que «esta subida se debe, polo menos en parte, á folga de funcionarios que desde febreiro ata maio de 2018 afectou ao normal funcionamento da Administración de Xustiza» na Comunidade galega. Deste xeito, ao pór en relación as demandas de ruptura matrimonial coa poboación a 1 de xaneiro de 2019, destaca o TSXG, «obsérvase por cada 10.000 habitantes en Galicia rexistráronse seis demandas no período estudado», fronte ao 6,3 de media estatal.
Segundo os datos feitos públicos pola Sección de Estatística do Consello Xeral do Poder Xudicial (CGPJ), en Galicia aumentan os divorcios consensuados de 628 a 846 (un 34,7 % máis) e os non consensuados pasan de 520 a 709 (un 36,3 %). En relación ás separacións consensuadas, a estatística reflexa que pasaron de 28 a 44 no primeiro trimestre do ano, mentres que as non consensuados pasaron de 9 a 19. Ademais, neste período rexistráronse dúas peticións de nulidade matrimonial.
Así mesmo, nos tres primeiros meses do ano rexistrouse tamén un aumento interanual tanto nos procedementos de garda, custodia e alimentos de fillos non matrimoniais, como nos de modificación de medidas en procesos de separación e divorcio. En concreto, entre o 1 de xaneiro e o 31 de marzo de 2019 iniciáronse 168 procedementos de modificación de medidas consensuadas, o que supón un 55,6 por cento máis que no mesmo período do ano anterior. As demandas de modificación de medidas non consensuadas pasaron de 387 a 439, un 13,4 por cento máis.
