David Val presentou onte no Fórum Metropolitano o seu libro «Un nómade en bicicleta. Pedaleando ao redor do mundo», e antes foi entrevistado os estudos de Radio Voz aos que chegou montado na súa bici desde Ferrol
13 jun 2019 . Actualizado ás 05:00 h.Predica co exemplo. Ás once e cuarto da mañá tiña que estar nos estudos de Radio Voz A Coruña para falar do seu libro. Titúlase Un nómade en bicicleta. Pedaleando ao redor do mundo e narra os 400 días da viaxe de David Val Pena por 20 países percorrendo miles de quilómetros sobre Quiscolina, que é como chama á súa pesada bici. Ás oito de mañá David mandou unha mensaxe ao programa Voces da Coruña para dicir que estaba no Ponche dás Pías e que saía para A Coruña. Ás dez da mañá unha oínte do programa cruzoullo no Pedrido e preguntoulle: «Es o que vai para a radio?». David asentiu e seguiu pedaleando. Pouco despois da once fixo a súa entrada nos estudos da emisora. «Veño canso. Teredes un Aquarius?», dixo coa lingua fóra. E é que xa hai dous anos que viviu a aventura que agora conta no libro e di que perdeu algo de forma. De todos os xeitos esta semana ten previsto presentar a obra nas sete principais cidades galegas e a súa intención é desprazarse dunha a outra na bici. «Decidín dar un cambio radical á miña vida e pedín unha excedencia no traballo. Quería coñecerme, atopar o significado da vida, promover a bicicleta como medio de transporte e ver a beleza deste mundo», resume David, que acudiu acompañado por Roberto Rilo, da asociación ciclista Crunia e pola tarde presentou o libro no Fórum Metropolitano. Contou como saíu do seu Foz natal camiño do sol nacente e pasou por tres continentes, Europa, Asia e América antes de regresar a casa 18.670 quilómetros despois.