O grupo Arcos Iris, integrado por músicos da Orquestra Sinfónica, estreou o seu novo espectáculo, «O mundo soa» no Teatro Colón, e ao final da actuación animaron aos nenos a subir ao escenario para compartir este momento
12 jun 2019 . Actualizado ás 05:00 h.Ao acabar o espectáculo Alison Dalglish animou aos nenos que enchían o Teatro Colón a que se subisen ao escenario. Esta simpática inglesa, viola da Orquestra Sinfónica de Galicia, engadiu «a ver se saímos en La Voz de Galicia». O certo é que Alison e os seus compañeiros do grupo Arcos Iris merecen ser destacados, pero non por que o pidan micrófono en man, senón polo gran labor que desenvolven. Cóntame Marcos Seoane, que se encarga da comunicación do grupo, que os pais de Alison levábana a cantidade de espectáculos musicais cando era pequena e que, agora, que é profesional da música, quere que os nenos se enganchen a este mundo de corcheas e bemoles. Hai uns anos que iniciaron este soño que aúna humor, teatro, colorido e notas musicais co obxectivo de que os nenos o vivan con entusiasmo. O que estrearon esta fin de semana é a terceira montaxe da súa carreira e o seu título é: O mundo soa. Outros entusiastas compoñentes da Sinfónica forman parte do proxecto. Trátase de Enrique Iglesias , Dorothea Nicholas, Mihai Tanasescu, Teresa Morales e Todd Williamson. O domingo o Colón encheuse con motivo da estrea. Agora o espectáculo destes seis músicos da Sinfónica recalará noutros puntos de Galicia para seguir enganchando aos nenos á música.