A oficina da Policía Local recibe entre 100 e 150 obxectos perdidos cada semana
A Coruña CIDADE
Centos de chaves, móbiles, carteiras e ata un canasto de gato agardan aos seus propietarios no cuartel do 092
19 abr 2019 . Actualizado ás 20:03 h.Hai dous anos, alguén se deixou un táper con macarrones nunha parada de autobús e un bo cidadán levouno á oficina de obxectos perdidos, onde estivo ata que a boloñesa empezou a cheirar. Este achado dá unha idea do que pode aparecer no cuartel da Policía Local de Orillamar. Porque non só se perden móbiles, chaves, carteiras ou cazadoras. Tamén dentaduras, canastos para gatos ou xoguetes eróticos.
A caixa á que van parar as pezas que a xente se atopa concentra humanidades tan diferentes que convén non macerarlas máis tempo do necesario. O que si chama a atención son as chaves. Hai decenas de feixes de persoas despistadas que quedaron de porta fóra. De casas, de coches, da avoa Fina... mesmo do «Rocho número 10». Ou do local comercial B-1 de sabe Divos onde.
Un equipo de tres axentes da Policía Local asumiron fai uns meses a xestión da oficina de obxectos perdidos e puxeron orde nunhas instalacións que gardan miles de pertenzas que a xente extraviou. Foron eles os que se atoparon coa mochila de Alba, a nena de 9 anos perdeu a súa carteira en xaneiro e hai uns días recuperouna grazas ao traballo do persoal da oficina.
É incrible o que os cidadáns poden chegar a perder. Como incrible é que só sexan uns poucos os que acoden á oficina despois de extraviar un obxecto. Esa falta de fe en atopar o perdido provocou que as dependencias se quedasen pequenas e tivesen que ampliar. Porque á oficina chegan todas as semanas unha media de entre 100 e 150 pertenzas de toda clase e condición.
«Se unha persoa perde unha muleta, que en principio é para axudarlle a camiñar, que non perderá?». Quen fala é un dos axentes que se encarga de xestionar os obxectos perdidos que chegan ás súas oficinas en Miguel Servet.
Chaveiros, lentes de sol e bolsas, bolsos, bolsitos e mesmo algunhas mariconeras entran a diario na oficina, estes días transformada en almacén de roupa e complementos por culpa das baixas temperaturas. «A xente non anda moi acostumada levar luvas, bufandas ou gorros, logo métese no bus ou nun taxi, sácallos e esquéceos». E no verán, pasa o contrario. O que se perden son toallas, bañadores ou lentes de mergullar. A listaxe de obxectos que chegan ao 092 pódese consultar na páxina web do Concello. Cada semana publícase o recolleito. Chegan preto de 6.000 obxectos ao ano e máis da metade non regresa aos seus donos.
Teñen caducidade. Se aos dous anos non aparece o propietario da cousa perdida, irá a mans da persoa que a entregou na oficina. Cando un cidadán se presenta en dependencias municipais cun móbil que atopou nun bus, por exemplo, deberá deixar todos os seus datos e entregaranlle un resgardo. Os axentes encargados, segundo explican, tratan de localizar ao lexítimo dono se o obxecto ten algunha pista que leve ao mesmo, «que case nunca a ten». Aos dous anos, quen o achou, poderá regresar ao cuartel co resgardo e o móbil é seu.
A picaresca brilla pola súa ausencia. «A xente realmente vén se perdeu algo, porque lle preguntamos todas as características do obxecto. Aproveitados hainos en todos os sitios, pero aquí perden o tempo». Precisamente o tempo é o que fai que mande a roupa de abrigo. Pero tamén hai lugar para perder un lote de cinco bragas, un guión de cine, un chupete, un balón de baloncesto, tres rolos de papel de agasallo, un libro de terceiro de ESO, o cepo do volante...