Vea, un can de palleiro de tres meses, recibiu o premio ao can máis bonito na «Puppy party» que organizaron no centro canino Coco Can de Oleiros
19 feb 2019 . Actualizado ás 05:00 h.Anunciárono como unha Puppy party. «Está enfocada a cachorros de 3 a 11 meses», explica Jacobo, Coco, Martí, emprendedor que está á fronte do centro canino Coco Can de Oleiros, en concreto en San Pedro de Nós. Pois á festa se apuntaron máis de setenta cachorros. ¡Guau! Pasáronllo en grande. «É a segunda que facemos. A primeira foi só para clientes e a esta podíase apuntar calquera. O obxectivo é a socialización canina entre membros da mesma especie, que na etapa de cachorro é moi importante para evitar medos ou agresividade no futuro», comenta Martí. Na festa déronse pautas aos donos, que realizaron uns exercicios con eles. «Despois soltáronse, con presenza de educadores caninos, e estiveron a xogar. Tamén houbo exhibición de habilidades caninas. Separámolos en dous grupos porque había algúns moi pequenos, como Blue, un husky de tres meses, e catro gran daneses de oito meses que xa pasan dos corenta quilos», comenta este profesional que xa pensa en repetir a experiencia en breve. Por certo, a festa rematou coa entrega de premios ao can máis simpático, máis bonito, obediente e ao mellor binomio.