O mercado da praza de Lugo estrea nova xunta directiva. Pedro Dafonte preside un equipo formado por Mónica Mella, Francisco Movilla, Ángela Iglesias , Cristóbal Troyón, Suso Tomei, Manuel Longueira e Belén Noriega
14 feb 2019 . Actualizado ás 05:00 h.«Queremos involucrar ao maior número de persoas posible. E por iso na directiva hai xente do peixe, da planta baixa, pero tamén carniceiros e froiteiros da primeira e segunda planta», coméntame Pedro Dafonte Deive, novo presidente da Asociación de Vendedores da Praza de Lugo. Toma a vez de Chelo Hermida, que decidiu non continuar despois de moitos anos. «Porque estaba aburrida e cansa de ver pouca colaboración, tanto no mercado como no Concello. Creo que facía falta un plan renove», comenta mentres atende a uns clientes. «A nosa idea é mellorar o diálogo co Concello porque hai moitos asuntos pendentes. E temos que contar cun xestor en condicións porque en cinco anos se acaban as concesións e é algo que preocupa ao sector», explica Dafonte. A substitución directiva tivo lugar onte e forman parte do novo equipo Mónica Mella, como vicepresidenta; Belén Noriega, como secretaria, e Cristóbal Troyón, tesoureiro. Os vogais son: Ángela Iglesias , Manuel Longueira, Francisco Movilla e Suso Tomei. Aí téñenos, dispostos a traballar para mellorar o mercado de referencia na Coruña. Pedro leva pouco tempo no mesmo, aínda que a familia da súa muller, Anxos Rumbo, é de sempre do peixe, primeiro en San Agustín e nos últimos tempos na praza de Lugo. «Eu traballei no sector da construción e a decoración. Tiven a miña empresa e arrastroume en tsunami da crise. No tempo que levou aquí creo que non caio mal. Non son conflitivo», afirma o novo presidente cun discurso moi moderado.