Aínda que o vexan así de abrigado, este empresario coruñés, que representa á terceira xeración de froiteiros da súa familia, está facendo o agosto. Esta semana as vendas de uvas multiplícanse por 200, e en YES retamos a Adrián Martí, director comercial de Froitas Irmáns Lago, a tomarse unha uva con cada pregunta.
29 dic 2017 . Actualizado ás 05:15 h.1 Cantas uvas repartides estes días?
A cantidade de quilos totais non a sei, porque cambia de ano en ano, pero é unha semana na que se multiplica por 200 o consumo dunha semana calquera.
2 Véndese máis ou menos?
Cada ano imos a menos. A tradición séguese mantendo, pero a xente vai a unha uva de peor calidade, que nas froiterías non as hai, e por iso véndese menos.
3 O Nadal é o mellor momento da uva?
Non. As variedades que máis se venden en España están no seu mellor momento xusto despois do verán. Entre setembro e novembro. Logo en España hai moita uva italiana.
4 Aquí cal é a que máis comemos?
A italiana, pero tamén outra variedade que desde hai uns anos véndese moito é a Dona María. É que aquí as uvas que temos son máis de facer viño que de mesa.
5 Como é a uva perfecta?
O que a xente quere cando vai comprar uvas é que o acio non se debulle, que o collas, levántelo e non caian; que teñan un tamaño bo, non moi grande, digamos mediano, e que estea rica de sabor, dulcita, que non teña pebidas... pero isto por outra banda encarece moito o produto así...
6 Canto supón máis que non leven pebidas?
Pode supor un 20-30 % máis que o prezo normal.
7 E en Nadal a uva subir moito á parra...
Se en setembro pode custar entre 1,5-2 euros o quilo, agora pódese vender por 2,5-3 facilmente. O que pasa tamén coa variedade de fin de ano, Aledo, que se produce maiormente en Alacante, está a ser moi demandada no estranxeiro, por iso estase pagando máis cara.
8 Por que é a «uva de fin de ano»?
Porque é unha variedade máis tardía que aguanta sen problema ata xaneiro, é a que mellor está agora mesmo. Ademais os produtores embólsana para que aguanten ben ata o Nadal.
9 Como é esta uva?
Hai diferentes tamaños. A pequena sabe peor, e de calidade baixa e a mediana ou grande é mellor.
10 A xente que prefire: calidade ou non atragantarse?
Queren un tamaño mediano.
11 E trae pebidas esta variedade?
Si, pero moi poucas.
12 Esta variedade compite no mercado coas «sen pebidas»?
Si, sen pebidas e as Aledo son as que máis se vende .
FOTO: CÉSAR QUIAN