Un veciño do lugar da Espenuca perdeu tres ovellas, pero optou por non reclamar «para evitar tanto papelorio»
23 oct 2019 . Actualizado ás 05:00 h.Sexan lobos ou cans salvaxes, varios gandeiros de Coirós perderon parte da súa riqueza nas últimas semanas. A zona da Espenuca volveu a ser o lugar dun novo ataque, no que un dos veciños perdeu as tres ovellas que quedaban. «E as tres preñadas», sinala José Luis, quen recoñece que optou por non reclamar o prezo dos animais «porque non compensa o pouco que che pagan por todo o papelorio e os desprazamentos que tes que facer á cidade». As ovellas atopábanse nunha parcela a apenas uns cen metros da casa cando foron atacadas.
Pero non foi o único damnificado dos últimos ataques de lobos -varias testemuñas aseguran velos na zona, así como excrementos desta especie-, que fai tres anos mataron todas as ovellas doutro residente.
Esta vez foi unha cabra que resgardaba nun galpón xunto á vivenda, pero os atacantes coáronse e tamén a mataron. Para rematar, tamén contabilizaron un carneiro noutra casa próxima da Espenuca como pasto dos lobos.
Os gandeiros reclaman axudas á Xunta para minimizar estes ataques, que se suman ás desfeitas que lles causa o xabaril nas colleitas. «Estamos vendidos, da igual o que fagas, todo son perdas», sinala unha veciña da Espenuca.