O avispero, de 1,16 metros de alto e 78 centímetros de ancho, contiña 811 obreiras e 171 novas raíñas
24 oct 2018 . Actualizado ás 18:21 h.A velutina continúa dando guerra na comarca coruñesa. Proba diso é o enorme niño que os operarios de Coirós retiraron este martes en Queirís (A Coruña).
«Ao sacalo e rompelo contamos 811 obreiras, 312 zánganos e 171 novas raíñas. Ademais, había sobre unhas mil larvas no interior», explica Lolo Andrade, especialista na avespa velutina. Andrade aclarou que agora, ao caer as follas das árbores, están a atopar «novos niños, sobre todo nas nogueiras». De momento, as velutinas seguen coa súa actividade, xa que «aínda hai bo tempo», explica Andrade, que engade: «Coa baixada de temperaturas iranse xa a hibernar».
Andrade traballa en Protección Civil de Cambre e desde hai anos colabora na retirada de niños noutros concellos como Coirós, A Laracha e Oza-Cesuras. «É importante concienciar aos nenos de que non tiren pedras aos niños. Cando imos retiralos, en moitos nos atopamos varias cravadas dentro. Os pequenos fano porque lles fai graza, pero é perigoso porque dentro hai moitas avespas e se saen a atacalos pode producirse unha desgraza», explica. O traballador tamén indica que no caso de que un cidadán identifique un avispero, «non intente retiralo. Debe notificalo ao 112 ou a Protección Civil».