Desde fai seis anos, Ángel Manuel Gil despacha pan na N-VI no centro de Guísamo (Bergondo). O nome do seu negocio xa delata o que aquí se vende : Pan de Carral, e este autónomo puido impulsar o seu negocio e mellorar en calidade de vida grazas ao Plan de Emprego Local para empresas, con axudas en dous anos.
«Somos un despacho de pan, non unha panadería, así que o maior custo é o da man de obra», explica Anxo. Recoñece que, aínda que a atención deste negocio non é un traballo de gran cansazo físico, si supón un gran sacrificio en canto á vida persoal. «Non tes fins de semana, abres de luns a domingo para fidelizar unha clientela e iso psicoloxicamente acaba sendo bastante duro», sinala este emprendedor que, en canto abriu o negocio pasaba xornadas «nas que che podías ler un libro». O malo é que, houbese pouco ou moito traballo, «non dispuñas de tempo libre para facer xestións». Un amigo avisoulle da axuda da Deputación para contratar a unha segunda empregada. «A tramitación é bastante confusa pero cando chamas para aclarar cousas son moi amables, por teléfono resolvín bastantes trabas á hora de preparar esta axuda».
Unha vez conseguida, Anxo puido contratar unha segunda empregada, o que permite aos tres gozar de horarios máis amables para todos neste local que vende «un pan que está a piques de obter a Denominación de Orixe Pan Galego».