A Federación Española de Municipios e Provincias outorga a Cambre o galardón por esta solución que evita que os animais morran atropelados
24 oct 2021 . Actualizado ás 23:35 h.O que ocorría coas lontras de Cecebre na estrada próxima á presa do encoro era un goteo continuo de atropelos. O Grupo Naturalista Hábitat rexistrou catro mortes destes animais nos anos 2017 e 2018, e sempre no mesmo punto. O veciño e fotógrafo Juan Veiga fora o primeiro en dar a voz de alarma. A transición das lontras entre o encoro e outra estancia xunto ao río Mero obrigáballes a atravesar o asfalto da AC-221, e moitas veces con resultado fatal.
Entre distintos expertos e o Concello de Cambre buscaron unha solución que resultase definitiva para conservar a poboación de lontras, un dos principais atractivos da fauna deste lugar. Este paso subterráneo baixo a estrada, flanqueado por valos a ambos os dous lados para evitar que as lontras acabasen por outras rutas na pista de asfalto, acaba de ser recoñecido nos III Premios ás Boas Prácticas pola Biodiversidade promovidos pola Federación Española de Municipios e Provincias (FEMP), concedido ao Concello de Cambre. Estes galardóns recoñecen algunhas das mellores prácticas municipais no campo da conservación dos espazos naturais e a protección da diversidade biolóxica.
O concelleiro de Patrimonio, Ramón Boga, que acudiu á entrega do premio en Madrid, destacou que o galardón «é o froito do traballo desempeñado nos últimos anos, así como da colaboración entre o Concello, veciños, expertos e outras administracións como a Consellería de Medio Rural, Emalcsa, o Grupo Naturalista Hábitat e a Reserva de Biosfera Mariñas Coruñesas e Terras do Mandeo».
Despois de establecer un primeiro contacto co veciño que alertou desta situación, iniciáronse as reunións con distintos organismos para estudar que opcións podíanse levar a cabo na zona. Finalmente, e tras consultar con varios expertos, determinouse que o paso de lontras sería a medida máis adecuada neste punto. «Ao principio optamos por unha solución de bandas rugosas acompañadas dunha sinalización nese punto», explica Andrés Pereira, do Grupo Naturalista Hábitat. Pero a Xunta, aínda que prohibiu esa solución polas características da estrada, ofreceu, desde a Axencia Galega de Infraestruturas (AXI), a opción do túnel baixo a vía.
A concelleira de Medio Ambiente e Mobilidade, Patricia Parcero, sinala, ademais, que foi un proceso «complexo no que se tivo que contar coas actuacións necesarias para executar este proxecto». A concelleira da área celebra o recoñecemento recibido por parte da FEMP e, sobre todo, «que grazas a estes traballos conseguiuse garantir a conservación desta poboación de londras, pero tamén a de moitas outras especies que habitan nesta zona. O encoro de Abegondo-Cecebre ten unha rica biodiversidade de flora e fauna, e unha das nosas premisas é promover a súa preservación».
O proxecto municipal incluíu a construción dun paso inferior baixo a estrada autonómica AC-221 mediante a instalación dun caño e boquillas con rampla asociada en cada extremo da estrada. Así mesmo, e co fin de garantir que os animais utilizasen esta senda, acometeuse o valado perimetral dos dous extremos da vía por onde adoitaban cruzar.
Un ano despois do remate desta estrutura, e coa axuda de cámaras de fototrampeo situadas no interior, constatouse que as lontras empregan este paso habitualmente. Ademais, desde que se concluíron estes traballos cesaron os atropelos. Para o financiamento, o GDR Mariñas-Betanzos fixo unha achega económica procedente do Programa Feader no marco do Programa de Desenvolvemento Rural de Galicia 2014-2020.