COMO BAIXAS A La AREAS? Uns van co posto, como Fran, e outros como Iván (exconcursante do reality «Adán e Eva») e Cristina, nai dun neno e dúas xemelgas, cargados de petates. Dime como es e direiche que carga de praia levas
13 jul 2019 . Actualizado ás 05:00 h.Aos seus 29 anos Fran Sánchez non se complica para ir tomar o sol. «Eu non levo nin toalla á praia», afirma Fran Sánchez. Aos seus 29 anos aproveita os poucos días que Lorenzo se deixou ver pola cidade herculina para coller un pouco de bronceado na area, pero sen levar unha mochila ao ombro para gardar as súas cousas porque por non levar, nin sequera leva crema para protexerse dos raios.
«Bótoma antes de saír da casa, logo na praia; se vexo que me estou queimando; pídolle a algún amigo que me deixe a súa. E se vou só, malo será que non ma preste alguén que estea na praia», di. En canto ao de non levar toalla, explica que normalmente acode acompañado ao areal e que o seu amigos sempre lle fan un oco nas súas. «Como agora levan estas toallas tipo pareo tan grandes sempre teño algún amigo que me deixa tombarme ao seu lado». E se vai só, se apaña. «Se veño só adoito vir en bicicleta, entón chego, doume un baño, sécome un pouco ao sol e sigo a ruta», di o cambrés.
Sen complicacións
Para Fran non é necesario ir cargado cunha chea de cousas para gozar do sol. «Levo posto o bañador, unha camiseta, as lentes de sol e sempre o móbil e a carteira porque hai que ter algo de diñeiro para tomar algo e non deshidratarse», confesa.
A pesar de que á praia non leva toalla por comodidade e non por esquecemento, admite que en ocasións si é un pouco descoidado. «Por exemplo no ximnasio algunha vez esqueceume o xel para ducharme, pero pídollo a alguén e solucionado». Como vive en Cambre e... vaia, vaia, alí non hai praia, elixe o areal ao que ir pórse moreno en función do medio de transporte que utilice. «Se aproveito para ir dar un paseo coa bicicleta, que é algo que me gusta moito, podo ir tamén á zona de Santa Cristina, en Oleiros, que é a que queda máis preto desde Cambre. Logo, outros días veño aquí a Riazor con amigos que viven na Coruña, ou xa as fins de semana desprazámonos a outras praias un pouco máis lonxe», explica.
