O Concello acumula o material nunha parcela no polígono de Espírito Santo
02 feb 2019 . Actualizado ás 15:56 h.Reducir, reciclar e reutilizar. O Concello de Cambre está a aplicar esta máxima ambiental en moitos dos seus proxectos urbanísticos e empezou a reservar e seleccionar pedras e sillares de cantería de demolicións para obras municipais.
O material xa se empezou a acumular nunha parcela do Concello no polígono de Espírito Santo e, a medida que sexa necesario, as pedras iranse trasladando a unha obra ou outra. «Esta medida non só supón unha vantaxe ambiental, senón que tamén supón un aforro económico porque non hai que comprar pedra nova e, ademais, tampouco hai que pagar por depositar estes restos nun vertedoiro autorizado», explicaron técnicos municipais. Aclararon que non todo o material das derribas pódese aproveitar, pero si gran parte. «En xeral son pedras de granito e de boa calidade, óptima para peches, muros de contención e, por exemplo, elementos ornamentais en parques e xardíns», concretaron.
Na parcela municipal de Espírito Santo xa hai acumuladas toneladas de material de derriba procedente das demolicións efectuadas recentemente na rúa Balado (no centro de Cambre), da antiga nave industrial da Telva (Sigrás) que corría risco de derrumbe, das coñecidas como placas de Sigrás e da antiga casa dos Molina, xunto á casa consistorial. «Seleccionar ten un custo, pero ao tempo son miles de euros os que se aforra o Concello. É moi vantaxoso reutilizar porque, ademais, a pedra adoita ser moi boa», confirmaron.
A primeira obra que se executará coas laxas e sillares reutilizados será na parroquia de Cela para a contorna do novo centro social. Xa se levou ata alí unha parte dos elementos e aproveitaranse para facer uns muros de contención graduados dunha altura aproximada dun metro, así como unha glorieta baixo o cruceiro, que permitirá pór en valor esta peza pétrea. No entanto, algúns veciños mostraron a súa preferencia para que se traslade o cruceiro uns metros, retirándoo da estrada. Segundo comentan, desta forma eliminaríase o risco de que sexa derrubado por un vehículo, algo que xa ocorreu con outra peza similar situada nunha intersección en Obra de Pano, no termo municipal de Bergondo .