As instalacións abrirán este luns e tamén se incluirán novas propostas ao aire libre
04 abr 2021 . Actualizado ás 15:26 h.O Espazo+60 de Afundación na Coruña (Rúa Alta, 7) e o Espazo +60 de Afundación en Betanzos (Cantón de San Roque, 3) renovarán a súa actividade este luns, con propostas presenciais no propio centro, que se complementarán con rutas pola cidade. O obxectivo é proporcionar ferramentas para minimizar os efectos que as limitacións na mobilidade e contacto social provocan na saúde física, psicolóxica e emocional das persoas maiores, como sucede con todos os sectores da poboación en xeral.
Todas as actividades se adaptaron á situación actual, baixo un estrito protocolo sanitario cun reducido número de participantes por actividade e aula; reorganización dos horarios e as zonas de entrada e saída; ventilación frecuente; suprímese temporalmente a realización de actividades que supoñan compartir materiais, e será obrigatorio manter en todo momento a distancia de seguridade recomendada. Así, a programación presencial ofrece na Coruña e Betanzos, dependendo do centro, talleres de pintura, fotografía, costas saudables, educación postural e prevención de caídas, ioga, pilates, ximnasia de mantemento ou sendeirismo saudable. Ademais, como novidade, en Betanzos, porase en marcha a actividade Contacontos no Pasatempo na que se creará un espazo de encontro intergeneracional no que persoas maiores voluntarias representarán contos infantís en presenza de nenas e nenos da localidade na contorna do Parque do Pasatempo.
A proposta inclúe tamén un completo programa de actividades formativas virtuais, na plataforma «+60 Classroom», que xa antes da pandemia era utilizada como soporte e extensión de actividades presenciais nos Espazos +60 e que actualmente intensificou a súa oferta. Así hai cursos de arte, de idiomas por niveis, fotografía, xadrez, historia ou recursos para superar as barreiras dixitais, entre outros. Como novidade se incorporan as propostas Viaxes desde a cadeira de brazos, na que persoas voluntarias dos Espazos+60 compartirán con outras socias e socios as súas experiencias visitando outros países, e Grandes personaxes e novelas de todos os tempos. As clases desenvólvense por videoconferencia cos docentes e o resto de participantes, previa inscrición. Así mesmo, as persoas que o precisen contarán con acompañamento dixital individualizado, xa sexa telefónico ou presencial no propio Espazo +60 para conectarse ás sesións.
Neste contexto cambiante pola pandemia pero tendo en conta tamén o avance da dixitalización en xeral e a adquisición progresiva por parte das persoas maiores de máis competencias neste ámbito, a entidade continuará enriquecendo este programa en convivencia coa súa oferta presencial.