Os peregrinos aumentaron nun 66 % durante o primeiro semestre do 2019. Polas oficinas de Turismo do Liceo pasaron 2.554 persoas, fronte ás 1.472 que o fixeron durante o mesmo período do ano anterior
16 jul 2019 . Actualizado ás 09:38 h.Percorrer Betanzos sen atoparse a viandantes con mochilas ás súas costas é difícil. A localidade continúa sendo un destino moi atractivo para os peregrinos que aproveitan o Camiño para coñecer unha cidade que ten moito máis que unha tortilla para ofrecer. Proba diso é que durante os seis primeiros meses deste ano a localidade rexistrou case un milleiro máis de peregrinos que durante o mesmo período que o ano pasado.
En concreto, pola Oficina de Turismo do Liceo pasaron 2.454 persoas no que vai do 2019 mentres que no 2018 fixérono 1.472. Desde o goberno local indican a que a esa cantidade habería que sumar a doutros grupos de persoas que chegaron a Betanzos dentro da ruta do Camiño Inglés, pero que non pasaron polas oficinas turísticas.
En calquera caso, os datos reflicten o empurre que a ruta supón para a localidade e «o crecemento que experimenta este roteiro xacobeo ano tras ano», tal e como indicou o concelleiro de Turismo, Pablo Beade. Beade recalcou tamén que as cifras do primeiro semestre demostran tamén a necesidade de contar canto antes cun albergue de peregrinos a pleno rendemento. «Que se poidan ofertar as 35 prazas que ten de capacidade o albergue, xa que a día de hoxe só pode ofrecer seis prazas, unha vez que non concluíron aínda as obras de mellora dos aseos. Unha situación que xerou durante as últimas semanas numerosos inconvenientes aos peregrinos», expuxo o concelleiro.
Doutra banda, desde a Concellería de Turismo destacaron que desde o Concello se reactivou a petición realizada á Xunta para que se actualicen os mapas da ruta xacobea. O goberno local solicitou á Consellería que se renovasen no 2009 e no 2013. Concretamente, nas peticións fíxose referencia «ao roteiro de unión entre Vilalba e Betanzos tendo en conta a importancia que ten para Betanzos este traxecto», manifestan.
Atendendo a que en 2021 celebrarase o ano Xacobeo, o Concello betanceiro estima que o número de peregrinos crecerá polo que é indispensable que se renove a sinalización dos mapas oficiais, xa que «posibilitaría a chegada de máis visitantes á cidade». Así mesmo, fontes municipais indican que «a pesar de que foi solicitada de forma oficial en varias ocasións, a día de hoxe non hai comunicación algunha por parte da administración autonómica». O Concello lamenta ademais que os mapas xacobeos non recollan o tramo de Vilalba a Betanzos, un feito que cualifican de «incomprensible».