O autor do crime de Betanzos fuxiu a Andalucía coa axuda dun familiar antes de entregarse
BETANZOS
A familia da vítima pide a pena máxima para o detido, que levaba fuxido dúas semanas
15 ene 2019 . Actualizado ás 19:16 h.«Fun eu, estou arrepentido e entreguei a arma do crime». Esa foi a frase coa que o colombiano Álex ?como era coñecido en Betanzos, aínda que empregaba outros nomes? autoinculpouse onte no xulgado de Betanzos da morte de Máximo Feliz, que morreu a madrugada do día 30 de tres navalladas. Declarou a preguntas do seu avogado, o penalista Manuel Ferreiro, tras entregarse o xoves voluntariamente, pero foi o único que dixo, xa que quere agardar o resultado de distintas probas, entre elas, a autopsia do cadáver, para buscar unha acusación por homicidio, e non por asasinato, que podería recortar a pena de 25 a 10 anos de prisión. O autor confeso do crime fuxiu o día do suceso acompañado por un familiar, co que estivo en Andalucía e que pode enfrontarse a unha condena por encubrimento.
Fronte á petición de atenuantes sitúase a familia da vítima. «Desde que o matou, todos os días me pregunto o mesmo. Quero saber por que o fixo». A que fala é Altagracia Feliz Ramírez. Está aínda conmocionada. Altagracia, a súa irmá María e a súa nai acudiron onte pola mañá ás dependencias xudiciais de Betanzos onde o detido prestaba declaración.
«O seu neto, de tres anos, aínda pregunta por Papito cando ve unha chamada de Galicia»
O Xulgado de Instrución número 3 decretou o seu ingreso en prisión provisional, comunicada e sen fianza no cárcere de Teixeiro. A Xustiza é agora o consolo da irmá da vítima: «A policía chamoume para dicirme que o entregaron. Supoño que o convenceron. Esnaquizaron á nosa familia. Aos que estamos aquí e aos de Santo Domingo. O seu neto, de 3 anos, aínda pregunta por Papito cando ve unha chamada de Galicia», relata entre bágoas. Di que aínda non teñen avogado. «Se estou máis tranquila? Quizais un pouco. Temiamos que fuxise a Brasil ou que nos fixese dano», responde .
«Temiamos que fuxise a Brasil grazas á axuda duns amigos portugueses que nos comentaron que ten. A miña irmá tamén tiña medo por se nos facía dano»
O seu irmán morreu tras recibir tres puñadas na véspera de Noitevella. Traballaba de mariñeiro en Canarias e viñera a visitalas. Betanzos é un municipio pequeno. Máximo coñecía ao presunto agresor, co que mantivo unha discusión na rúa antes de morrer. «A súa irmá chamou hai dous días a casa. Creo que quería desculparse, dixo que ela non tiña nada que ver. Ao noso irmán ninguén nolo pode devolver. Non hai nada no mundo que pague unha vida. Pero, polo menos, que teña a pena máxima», pide.
«Todo apunta a que o detido entregouse debido á presión de saberse identificado pola Garda Civil», sinalan fontes do instituto armado.
