Os veciños volveron manifestarse onte para forzar ao Goberno central a retirar o proxecto de liña férrea nos termos actuais
29 nov 2025 . Actualizado á 05:00 h.Vecinos afectados pola obra da liña férrea para suprimir o baipás de Infesta e representantes locais volveron onte a mostrar o seu rexeitamento ao proxecto, ao entender que provocaría un impacto inasumible na parroquia de Cortiñán. Durante a protesta, as persoas participantes cortaron de xeito puntual a DP-0105 tras unha pancarta co lema «Por unha alternativa xusta. Cortiñán non se mutila», visibilizando así a súa oposición ao trazado proposto polo Goberno central.
Reclaman unha opción máis económica e máis respectuosa co territorio. O Concello non se opón á mellora das comunicacións ferroviarias, pero insistiu en que o proxecto actual non achega ningún beneficio real nin para Cortiñán nin para Bergondo. Sinala que todo se reduce a un suposto aforro de seis minutos, mentres segue sen abordarse cal debe ser o futuro do transporte cara a Ferrol. O Concello presentou un recurso formal ante o ministerio tras o rexeitamento estatal á proposta municipal coñecida como Alternativa 5S, deseñada para afastar o trazado das vivendas, reducir as expropiacións e minimizar o impacto social e urbanístico.
A Administración local insiste en que a alternativa estatal deixa moitas vivendas atrapadas na zona de servidume ferroviaria, devalúa propiedades e limita gravemente o desenvolvemento urbanístico dunha zona xa consolidada. Segundo o goberno local, esta situación non é lóxica, nin humana, nin politicamente aceptable.