A modificación urbanística implica a suspensión de licenzas
16 ene 2020 . Actualizado ás 05:00 h.Bergondo elevou onte ao DOG a aprobación inicial da modificación puntual oitava das normas subsidiarias de plan do municipio, que afecta a parte do núcleo de Gandarío , ao que está obrigado o Concello para cumprir unha sentenza de apelación da Sección Segunda da Sala do Contencioso-Administrativo do Tribunal Superior de Xustiza de Galicia emitida no 2015.
Agora o expediente sométese a información pública durante dous meses, nos que se poderán presentar alegacións. Esta aprobación implica a suspensión da tramitación das licenzas de parcelación, edificación e demolición da área afectada durante un período máximo de dous anos.
A modificación afecta a unha superficie de 0,68 hectáreas, na que se inclúe un pequeno tramo de ligazón da DP-0809, que é a vía que leva á praia, e implicará adaptar o trazado dun camiño á realidade. Especifícase que o trazado do mesmo debe ter un ancho de oito metros como se indicaba nas licenzas concedidas no seu momento na zona.
Esta modificación do plan arrinca dun litixio xudicial pola segregación dunha parcela nese lugar e porque os peches de parcelas contiguas realizáronse cun retranqueo ao camiño existente, pero este non estaba axustado ao trazado que figuraba nos planos das normas subsidiarias.
No fallo obrígase ao Concello «a levar a cabo as accións necesarias para adaptar o peche das leiras litigiosas ao disposto nas Normas Subsidiarias de Plan a fin de poder resolver a solicitude de segregación de parcela da parte demandante».