A prestixiosa consultora impartirá un curso para mellorar a venda en liña
02 ago 2021 . Actualizado ás 00:22 h.A xoiería Barca é unha desas reliquias que se manteñen co paso dos anos. Fundada por Manuel Barca en 1968, este negocio viu crecer a avenida principal da localidade, cando todo eran parcelas salvo o bar Insua, ese bloque gris na esquina aos que entón chamaban «o Muiñeiro».
A xoiería está en mans da segunda xeración, os fillos de Manuel. A trasfega de xente que entra e sae proxecta unha imaxe de saúde económica neste local. Pero a actual responsable, Montse Barca Amado, sabe que nos tempos actuais o escaparate da rúa empeza a perder fol con respecto a outro cristal máis potente: o da web e as redes sociais, cunha venda on-line que crece exponencialmente.
Para esta transformación dixital, o Concello de Arteixo contratou un curso que se realizará os próximos meses e que serán impartidos pola consultora Milbrait, formada polas irmás Cristina e Ana Gil Rey . Os usuarios non están ante unha firma calquera. Recentemente ambas organizaron na Coruña un foro cos maiores expertos en Intelixencia Artificial, e prestan regularmente os seus servizos a grandes compañas ou a Administracións como o Ministerio de Educación. Este ano acudirán a Venecia para participar nunhas conferencias sobre o coche autónomo.
Porta a porta
Pero agora o seu reto é preparar a todos os comerciantes e hostaleiros de Arteixo que o desexen ao salto dixital dos seus negocios. Durante estes días iniciaron un porta a porta para presentar o curso gratuíto e animar a apuntarse (pode facerse a través de emprego\
«Sei que o curso de dixitalización vai mellorar a miña tenda on-line», sinala a xoieira Montse Barca. «Agardo que isto me axude a difundir os meus produtos, gañar clientes en Facebook e outras redes, e ademais, é un luxo ter un curso así ao lado de casa, non podes desaproveitalo», engade. «Isto da Internet era imposible de imaxinar cando abrín a tenda», ri o seu pai.
Ademais de todo o apuntado, Arteixo É-dixital (así se chama o curso) ofrece aos asistentes a resolución de dúbidas legais, axuda a crear sinerxías entre os propios negocios de Arteixo e colabora na realización do material idóneo para promover o pequeno comercio. A inscrición está aberta durante todo o mes de agosto.