O Concello rexistra 200 depósitos ilegais á semana
26 sep 2020 . Actualizado ás 05:00 h.Algunhas persoas están a tomar como punto limpo calquera esquina de Arteixo na que haxa un colector. Nos últimos meses, o departamento de residuos deste Concello está a rexistrar á semana preto de 200 depósitos ilegais de aveños e restos de obras nos illotes de colectores de todo o municipio. Abundan os cascallos, colchóns e electrodomésticos. «Sospéitase que son unhas empresas moi concretas encargadas da repartición de mueblerías e tendas de electrodomésticos que deixan tirados ese tipo de aveños nos colectores para aforrarse o trámite de chamar a un xestor autorizado para que se ocupe da retirada como marca a lei en caso das empresas», indica o concelleiro de Servizos, José Manuel Pena.
Este tipo de verteduras son moi comúns en Arteixo, especialmente os de obra, segundo lembra o alcalde, Carlos Calvelo, «por lindar coa cidade da Coruña». «Son moitos os encargados de pequenas obras que nos visitan para deixar os seus restos con nocturnidade», sinala o rexedor, quen lembra que o servizo de punto limpo é obrigatorio para as empresas do municipio que queiran desfacerse deste volume de aveños. No caso de particulares que queiran colocar algún elemento xunto aos colectores deben chamar ao 981 659 084 para dar aviso, e deste xeito o servizo de recollida trasládao ao momento limpo de Sabón. Os horarios son de 9.30 a 13.00 e de 15.30 a 19.00 de martes a venres, os sábados de 9.00 a 14.00, e os luns de 10.00 a 13.00 e de 15.30 a 18.30. O Concello de Arteixo tamén está xestionando a compra, antes de final de ano, dun punto limpo móbil (un camión adaptado) para que percorra as distintas parroquias.