O día 29 máis de centenar e medio de pilotos sairán de María Pita para un percorrido inédito de tres tramos a tres pasadas que dá inicio ao Campionato Galego
31 ene 2020 . Actualizado ás 08:53 h.Menos mal que o 2020 é ano bisiesto. Porque o 29 de febreiro será un día grande para o automobilismo galego. Ese día arrinca de verdade o Campionato Galego de ralis, coa disputa do da Coruña, cita emblemática cuxa presentación oficial no parque pechado de María Pita celebrarase a noite anterior.
Este ano, ademais, o rali coruñés estreará formato, acorde coa nova regulamentación da Federación Galega de Automobilismo: tres tramos a tres pasadas. A escuadra organizadora, One Seven Racing (con Álvaro Muñiz á cabeza), dá forma deste xeito a unha vella proposta súa para facer máis atractivo un dos ralis máis queridos do calendario autonómico.
Deste xeito, a acción centrarase nos concellos de Aranga, Cerceda, Culleredo e Arteixo. One Seven Racing conseguiu introducir prometedoras novidades nun percorrido inédito, á vez que conserva determinados treitos que son os predilectos do público e os participantes, pola súa espectacularidade.
Do Palacio a María Pita
Os prolegómenos da carreira propiamente dita servirán de excelente aperitivo para que os coruñeses gocen da presenza dos bólidos nas rúas da cidade herculina.
O venres 28 de febreiro, desde as doce do mediodía ata as catro e media da tarde, a chaira do Palacio dos Deportes de Riazor acollerá as verificacións técnicas e administrativas, o que provocará o desfile dos coches de carreiras máis punteiros que poden competir nas estradas galegas.
Despois da burocracia, a caravana de bólidos desprazarase ata a praza de María Pita, na que One Seven Racing inaugurará oficialmente a tempada 2020 nos ralis galegos, por medio dun espectáculo de luz e son que aumentará as revolucións de todos os presentes.
De novo, e a medida que se vaian presentando os equipos, o impoñente elenco de participantes no renovado rali da Coruña, volverá percorrer as rúas da cidade ata polígono de Vío, onde permanecerán as máquinas á espera da gran xornada do sábado.
Ponche Aranga
Aranga será o primeiro destino. Desde alí partirá o primeiro tramo cronometrado, cuxa primeira pasada se celebrará ás 8.28 horas. Punto xa icónico do rali coruñés é Ponche Aranga e a propia casa consistorial.
As Encrobas e a rotonda de Boedo
Tras o primeiro paso por Aranga, os equipos terán que enfrontarse ao tramo de Cerceda, bordeando o lago das Encrobas. Cada bucle pecharase co tramo de Culleredo-Arteixo. Un ano máis, a rotonda de Boedo protagonizará os momentos máis intensos do rali.
Tras os tramos, a praza de María Pita espera aos equipos ao redor das nove da noite para celebrar a entrega de premios e o podio final sobre as dez menos cuarto da noite.
ANÁLISE DOS TRAMOS
Aranga
Iníciase nunha zona moi estreita e técnica, que servirá para pór a proba desde o principio a todos os equipos. Tras estes primeiros quilómetros, o tramo discorrerá por unha zona rápida, na que calquera dúbida pode facer perder valiosos segundos, que despois serán complicados de recuperar na zona final, unha vez superada Ponche Aranga, onde o percorrido se estreita novamente.
Cerceda
O tramo percorre case a totalidade do perímetro do lago das Encrobas, mesturando zonas moi rápidas e técnicas, na que a confianza nas notas tomadas nos recoñecementos pode marcar a diferenza. O asfalto desta especial é bastante liso, o que pode convertelo en moi deslizante en caso de atoparse con humidades. A súa zona final, con grava miúda, pode marcar as diferenzas a favor dos equipos que decidan arriscar nela.
Culleredo-Arteixo
A rotonda de Boedo volverá ser o epicentro da acción deste tramo, onde os miles de afeccionados que se agardan na zona poderán gozar de forma máis que segura do paso no sentido contrario ás agullas do reloxo pola xa famosa rotonda da localidade cullerdense. Trátase do tramo máis curto do percorrido, polo que os equipos terán que arriscar antes de chegar a esta especial xa que non se agardan grandes diferenzas na pelexa contra o cronómetro neste treito.