Afectaría á parroquia de Folgoso
21 jul 2019 . Actualizado ás 05:00 h.O Concello de Abegondo manifesta o seu absoluto rexeitamento ao proxecto de construción dunha subestación eléctrica que pretende Rede Eléctrica no seu territorio. O alcalde, José Antonio Santiso, trasladou a negativa dos veciños nun pleno extraordinario no que mostrou a súa oposición tallante ao proxecto e anunciou que utilizará todos os medios xurídicos e políticos posibles para que se rectifique. Este proxecto suporía a construción da subestación nunha superficie de catro hectáreas e as torretas terían unha altura de 50 metros, afectando á parroquia de Folgoso. Na contorna das instalacións proxectadas atópanse vivendas e espazos públicos e naturais como o encoro de Beche. O Camiño Inglés a Santiago e unha mámoa sobre a que hai estudos arqueolóxicos son os espazos que sufrirían unha maior alteración. A idea de construír a subestación saíu á luz en 2016, cando Rede Eléctrica elaborou un documento inicial no que valorou diferentes posibilidades e que sacou a consulta pública. O Concello e os veciños afectados presentaron alegacións para demandar unha alternativa que minimizase o impacto sobre a poboación, a natureza e a paisaxe. Pasados case tres anos, os veciños de Abegondo quéixanse de non ter recibido ningún tipo de información sobre os plans da compaña. «Non imos admitir unha nova infraestrutura con gran impacto e sen beneficio algún, como foi o caso da autoestrada AP-9», asegurou Santiso.