Apunta ao investimento millonario do POS+ e á creación de emprego do PEL
18 jul 2025 . Actualizado á 18:54 h.O presidente da Deputación da Coruña, Valentín González Formoso, e o vicepresidente, Xosé Regueira, fixeron este venres balance dos dez anos do goberno provincial, formado polo PSOE e o BNG. Ambos os dirixentes destacaron de novo a eficacia do Plan de Obras e Servizos (POS+) e os logros do Plan de Emprego Local (PEL), entre outros aspectos da xestión.
«Investimos preto de mil millóns de euros co Plan de Obras e Servizos, creamos o PEL con 125 millóns de euros e a creación de 8.000 postos de traballo», avanzou González Formoso. O presidente volveu reivindicar a Deputación como a Administración que máis proxectos financia no medio rural. «Neste eido investimos nós máis na provincia da Coruña que a Xunta nas catro provincias», asegurou, e subliñou que «pagou a pena esta aventura». Engadiu que desde a súa chegada no 2015 cambiouse o modelo de sostemento de infraestruturas por un enfoque que actúa como motor económico na provincia.
Pola súa banda, o vicepresidente Xosé Regueira defendeu o modelo provincial en contraste con outras Administracións. «Se hoxe desaparecese este apoio da Deputación, moitos sectores coma o deporte, a cultura ou a empresa caerían con el», indicou, reivindicando a utilidade da institución para o tecido social e económico.
Na quenda de preguntas, González Formoso referiuse ao novo ditame sobre a AP-9, ao que ve como unha oportunidade. «Acabará xudicializado, pero a cidadanía quere a gratuidade e o rescate non pode ser a costa dos cidadáns», afirmou.
Tamén foi preguntado pola creación da nova facultade de Medicina na Universidade da Coruña (UDC), ante o cal reiterou a súa postura: apoiou a súa implantación pola necesidade de formar novos profesionais sanitarios, pero pediu que se respecte o papel central da facultade existente en Santiago de Compostela. «Non se deben interromper vocacións cando a sociedade tamén demanda médicos», concluíu.