As entradas para a tempada lírica 2022 de Amigos da Ópera da Coruña saen á venda o próximo 6 de xullo
A Coruña
Con esta tempada celebrarase o LXX aniversario da Asociación coruñesa
04 jul 2022 . Actualizado ás 13:56 h.A Asociación Amigos da Ópera anuncia a venda de entradas para a súa nova tempada lírica. Os días establecidos para que os socios compren os seus abonos son desde o mércores 6 ata o mércores 13 de xullo, e poderán facelo nas oficinas do Teatro Colón de 11.00 a 14.00 e de 17.00 a 20.00 horas. Os tres primeiros días, 6, 7 e 8 de xullo están destinados a vender os abonos de socio con butaca asignada. O luns 11, os socios poderán comprar os abonos con butacas non asignadas. Ao día seguinte, día 12, habilitarase a venda das entradas soltas para abonados, que contarán cun 20 % de desconto. Para rematar, o mércores 13, facilitarase a retirada das butacas dos seus acompañantes.
Para o público xeral a venda de entradas non dará comezo ata o día 20 de xullo, que se realizará a través da páxina oficial de ataquilla e na Praza de Ourense de luns a venres de 11.00 a 15.00 e de 16.30 a 19.30 horas.
As entradas terán un custo que variará entre os 12 e os 90 euros, dependendo do evento e do centro cultural: Teatro Colón, Teatro Rosalía de Castro e Ágora. Existen tamén programacións de carácter gratuíto que terán lugar nos centros cívicos e Afundación, para os que se aceptarán espectadores ata encher a capacidade.
Tempada 2022
A 70 edición ten un repertorio completo e variado no que se inclúen óperas, concertos e recitais. O inicio do ciclo está programado para o 1 de setembro co concerto da soprano armenio-lituana, Asmik Gigorian, no Teatro Rosalía de Castro, e durará ata o día 7 de decembro, pechándose coa actuación de Roberto Alagna coa Orquestra Sinfónica de Galicia, no Teatro Colón, o único escenario de toda España ao que acudirá o tenor.
Entre ambas as datas poderase asistir a actuacións de gran calibre como A forza do destino de Verdi, o día 3 de xullo, ou a Gran Gala Lírica o 10 de setembro, con Ángela Meade, Moises Martín, Verónika Dzhioeva, Mönica Redondo, Nicole Brandolino, Borja Quiza e Luiz-Ottavio Faria, coa Orquestra Sinfónica de Galicia, baixo a dirección de Pérez Sierra .
Destacan tamén a ópera representada Norma que ocupará os días 22 e 24 de setembro, ou o ciclo As nosas Voces con Vanessa Goikoetxea e Miquel Ortega ao piano, que será o día 13 de outubro. En novembro poderase acudir á ópera barroca Ariodante, o día 9, e á nova edición de Novas Voces Galegas os días 2 e 22, entre outros eventos. A programación detallada pode consultarse na páxina da Asociación Amigos da ópera da Coruña.
Xunto á tempada lírica 2022 volven tamén outras actividades culturais como o ciclo de cine que se desenvolverá os luns de novembro no auditorio de Afundación, o ciclo de lírica inclusiva nos centros cívicos dos Mallos, pensada para o público máis novo.