A entidad Só lles falta falar levou a varios cans ao CEIP Vila de Rutis de Culleredo para mostrar as súas habilidades aos estudantes
03 dic 2021 . Actualizado ás 18:23 h.O sanbernardo Teixo, o setter irlandés Cork, o san huberto Alfredo, o mestizo de pastoreo Yango, a malamute Yena, a golden retriever Suca, o caniche Pirico e o pastor alemán Porto, que está a se preparar para ser un can de asistencia, visitaron onte o CEIP Vila de Rutis. Forman parte do club de cans de familia Só lles falta falar, unha entidade na que se integraron unhas 300 familias e que fomenta a tenencia responsable de cans e a súa integración plena na sociedade.
Os animais, dóciles e acostumados participar neste tipo de experiencias, estiveron, en varias quendas, cos alumnos das distintas clases, permitindo unha aproximación e dando a oportunidade aos seus donos para contestar as dúbidas respecto do seu labor.
«Algúns destes cans de familia son adestrados para soporte terapéutico e tamén hai cans de asistencia e de busca de persoas», explica María Sabell, especialista en conduta animal. Sabell leva na entidade desde que se creou no 2008 e destaca o labor de voluntariado dos seus integrantes. «Hai xente que en vez de ter un can para non facer nada o adestra o suficiente para poder participar neste tipo de intervencións», comentou.
«Hai moitos cans aptos para facer este traballo», remarcou esta adestradora de cans, que animaba aos estudantes a tocar aos exemplares. Segundo o nivel dos nenos respondíase a distintas cuestións como de onde viñeron, que traballos realizan e tamén se lles trasladou a mensaxe de que «os cans son algo máis ca unha mascota que non fai nada, os cans que temos na casa tamén poden facer cousas útiles».
«De normal os nenos teñen curiosidade e preguntan polo máis dispar», recoñeceu Sabell. Nunha das clases con alumnos de tres anos houbo un pequeno que non quixo saír ao ver os animais, conformouse con observalos a través da fiestra, e outra os miraba con algo máis que respecto. Para eles desdeó lles falta falar S contan cun taller para perderlle o medo aos cans. O resto de compañeiros, en cambio, non perderon nin un momento para lanzarse a acariñalos e peitealos. «É unha oportunidade de fomentar a súa motricidade», dixo Sabell sobre unha visita na que se lles permitiu pasealos con correas auxiliares.
É a primeira vez que levaba a cabo esta actividade no centro. Foi a proposta do departamento de Orientación, xa que unha dos seus integrantes é membro da entidade e fixérono coincidir coa véspera do Día da Discapacidade. A concelleira de Educación de Culleredo, Jéssica Méndez, visitou o CEIP e dixo que era «un orgullo acoller unha iniciativa como esta ,cuxo precedente xa foi no pasado o programa READ. Cans e letras, con cans de terapia e que supón un feedback tremendamente positivo para as nenas e nenos».