Os ciclistas alertan da grava miúda e os desniveis tras os novos asfaltados na comarca

Non é doado ser ciclista afeccionado na comarca coruñesa. Pero iso non mingua a presenza dos amigos das dúas rodas, especialmente as fins de semana, convivindo co tráfico. O lector non vai atopar aquí incidentes entre condutores e ciclistas, adiantamentos a niveis de manillar, en ocasións co agasallo de varios segundos de claxon desde algúns vehículos, que se toman como antinatural conducir detrás dunha bicicleta. Ese é un grave problema cívico que necesitará o paso de varias xeracións e unha cultura de locomoción sostible co Medio para que as estradas sexan lugares seguros para os ciclistas. De momento, a realidade salpícase con mortes como as de Pedro Alonso, o triatleta que morreu este mes de febreiro atropelado nunha angosta vía de Bergondo .

Pero estes deportistas conviven con outro grave problema do que acaban de dar traslado á Consellería de Infraestruturas, á Deputación da Coruña e á Demarcación de Estradas do Estado. Trátase do mal estado en que se atopan moitas cunetas das principais vías da área metropolitana. Nun escrito a estas tres Administracións, demandan a roza e a limpeza da maleza que invade a área vertical de circulación da beiravía; a eliminación da grava miúda e outras partículas provocadas polo tráfico rodado, ou repensar a colocación dos captafaros horizontais. «Están colocados na metade da beiravía, co que ao circular a certas velocidades é moi difícil esquivalos», explica Javier Barbeito, un dos promotores da queixa colectiva, apoiada por unha vintena de clubs ciclistas da comarca. Respecto da grava miúda, esta pode acabar xerando momentos de tensión entre bicicletas e coches. «Os condutores ven, por exemplo, que seguimos polo carril cando temos unha beiravía ancha e non nos poden adiantar, pítannos para que nos apartemos porque entenden que temos espazo dabondo, pero ignoran que o que facemos é evitar a grava miúda que nos picaría unha roda con toda seguridade», explica Barbeito. «O último domingo o meu grupo e eu vimos a un ciclista ferido por culpa da grava miúda na DP-1913 na Laracha».

Doutra banda, para as persoas alleas ao ciclismo na estrada, apenas resulta imperceptible o feito de que os novos asfaltados non cubran todo o ancho da superficie viaria. Pero deixar pequenos chanzos laterais é unha trampa moi perigosa para os deportistas. Este verán, coa sucesión de obras nas principais estradas, atopáronse con abruptos desniveis que xa provocaron algunha caída.

O informe foi elaborado tras repasar o estado das vías máis transitadas na comarca coruñesa, como son a AC-840 entre Trasanquelos e Oza dos Ríos; a AC-214 entre Cambre e Pravio; a AC-523 no tramo de Mesón do Vento a Ledoño; ou o recente asfaltado na N-VI entre Guísamo (Bergondo) e Montesaeiro (Aranga). «Aquí percíbese un gran chanzo entre a calzada e as beiravías». O documento está asinado por unha vintena de clubs ciclistas: Cambre, BTT Carral, Pena Ciclista Monte Xalo, Betanzos, Eumebike, A Fuga Grupetta, Gacela, Asociación Deportiva Jarnachas, Caimanes, Mesoiro, Monteneme, Norinver, Nosportlimit, Quintena, Riazor, Sada, Seixo Branco, Tambrebike, Terras do Eumebike, Tríatlon Coruña e Vilalba-As Pontes.

---

---

---