Destinará 13 millóns de euros a instalar 59 novas camas, 30 postos de UCI e coidados intermedios, 102 postos de hospital de día e 32 postos de consultas, ademais de ampliar os servizos Urxencias, Farmacia e Mantemento
29 may 2020 . Actualizado ás 14:32 h.A Xunta pon en marcha a primeira obra do futuro NovoChuac . O presidente do Goberno galego, Alberto Núñez Feijoo, acaba de anunciar a contratación das obras de rehabilitación dun dos edificios que formará parte do futuro complexo.
Os traballos contan cun orzamento de 13 millóns de euros, que se investirán en ampliar tres servizos, o hospital de día e o número de salas de consultas, entre outras melloras.
Feijoo detallou que se ampliarán os servizos de Farmacia, que disporá de 250 metros cadrados máis; Urxencias, que contará con outros 4 boxes e máis espazo para observación, e o de Mantemento.
As seguintes plantas do inmoble utilizaranse para a instalación de 102 postos de hospital de día para os servizos de Oncoloxía, Alergología, Dermatoloxía e Oficina de Coordinación de Transplantes, ademais de espazos polivalentes.
Ademais construiranse 32 locais de consultas externas e, distribuídas en dúas plantas, colocaranse 58 camás de hospitalización, parte delas en cuartos individuais. Na sexta planta instalaranse novas unidades de coidados intensivos e coidados intermedios que contarán con outras 30 camas.
O presidente da Xunta destacou que se pon así en marcha a comprometida ampliación do hospital, na que o Goberno galego ten previsto investir 400 millóns de euros. Uns 300 destinaranse á construción de novas infraestruturas hospitalarias, e cen máis se dedicarán á compra de equipamentos e tecnoloxía sanitaria.
Feijoo engadiu que a ampliación suporá duplicar a actual superficie sanitaria, incrementando en un 108 % o espazo dispoñible en Urxencias, nun 50 % as consultas, nun 30 % os quirófanos, nun 90 % a hospitalización de día e nun 15 % as camás, das que un 55 % estarán en cuartos individuais.
