Actos de recordo na primeira xornada de loito nacional, que vai durar dez días, nos que tamén as bandeiras ondean a media hasta
27 may 2020 . Actualizado ás 16:48 h.As bandeiras ondean a media hasta e nos municipios hase gardado un minuto de silencio en homenaxe aos falecidos por mor da pandemia do coronavirus. Así comezan os 10 días de loito nacional decretados polo Executivo central, que na Coruña tivo o seu máximo expoñente fronte ao palacio municipal de María Pita coa alcaldesa da cidade, Inés Rey , á fronte. Tamén se lembrou ás vítimas na sede da Delegación do Goberno.
A rexedora coruñesa sinalou que o risco de contaxio segue presente, polo que «cómpre extremar as precaucións e as medidas de hixiene e seguridade». Rey destacou que a recuperación da actividade xa é visible na Coruña coa apertura de comercios e locais de hostalería: «Sen limitacions das franxas horarias para as saídas, imos saíndo pouco a pouco do letargo en que estivemos sumidos e acadando a normalidade». En canto ás consecuencias económicas do estado de alarma, a alcaldesa apuntou que «a crise xa se sabía que viría. Por iso, estamos traballando para sacar adiante o plan de reactivación económica e social da Coruña, co fin de paliar os efectos da crise e que os sectores máis afectados a superen coa axuda da Administración».
Noutras localidades da comarca sumáronse a este acto, como é o caso de Sada e Miño.
Tamén na Comandancia da Garda Civil da Coruña homenaxearon ás vítimas.