As precipitacións serán de débiles a moderadas e irán desaparecendo durante a tarde
24 feb 2020 . Actualizado ás 22:10 h.Despois da influencia anticiclónica que viviu Galicia nos últimos días o tempo dará un novo xiro nun febreiro cambiante. Pero non será de inmediato. O bo tempo, con temperaturas superiores ao que é habitual nestas datas, con máximas de 20 graos nalgúns puntos da comunidade, manterase ata durante boa parte da xornada de hoxe. Pero pola tarde xa empezarán a xurdir no ceo nubes en altura. É o indicativo do cambio. Deste xeito, non se descarta que pola noite empecen a aparecer as primeiras precipitacións, en especial na zona norte.
A choiva será a protagonista do Martes de Entroido en Galicia. Pero con matices. Serán precipitacións de débiles a moderadas na práctica totalidade da comunidade durante a mañá, aínda que pola tarde empezarán a desaparecer. Os ceos empezarán a abrirse primeiro no norte e paulatinamente a situación será xeneralizada.
Pero a choiva non será o único dato relevante do Martes de Entroido. Tamén o será o frío, aínda que non porque os termómetros se sitúen en rexistros inusuais, senón máis ben ao contrario: volverán ser os habituais da época. Así, no norte as temperaturas máximas roldarán os 13 e 14 graos. Nada inusual, pero case sete graos menos que a fin de semana nalgúns puntos da comunidade.
Por contra, a maior nebulosidade suavizará as temperaturas mínimas -circunstancia que xa se empezará a notar na noite de l luns ao mares- que nos últimos días rexistráronse durante a noite e primeiras horas da mañá. Esta situación levou a que se producisen xeadas en distintos puntos de Lugo e Ourense. Por exemplo, en Calvos de Randín (Ourense), o mercurio situouse nos 5 graos baixo cero este domingo e en 6 o sábado.
Posibilidade de neve
En canto ao resto da semana, o mércores tamén é probable que xurdan algunhas choivas, pero de forma débil. Será por pouco tempo, porque a influencia das altas presións volverá apoderarse da comunidade. Os modelos apuntan a que o venres e o sábado o ceo galego estará despexado, pero con aire frío. Non se descarta mesmo, segundo as previsións de Meteogalicia, que poidan aparecer precipitacións en forma de neve nas zonas altas de montaña. Pero aínda é pronto para afinar a predición a tantos días.