Miguel Ángel Roig, Rubén Escudero e Jaime Vilasoa recuperan «a cultura de leira»
17 ene 2020 . Actualizado ás 10:16 h.Para Miguel Ángel Roig, Rubén Escuredo e Jaime Vilasoa o novo decenio empeza coas mans enfrascadas nun obxectivo: o desenvolvemento dos Biosbardos, un proxecto de agricultura ecolóxica baseada nos principios da permacultura e os bosques comestibles no lugar de Lendoiro, en Cambre . É a recuperación da «cultura de leira», aseguran. «Estas terras levaban 16 anos cheas de silveiras. Nun principio ían ser a ampliación do polígono do Espírito Santo, pero coa crise cambiáronse os plans», lembra Miguel Ángel Roig, que cambiou o seu traballo de desenvolvemento tecnolóxico nunha empresa por esta iniciativa de agricultura 100% ecolóxica e sostible: «Un día coñecín a Rubén, que ten a cooperativa A Flor dá Vida, de xardinería regenerativa, e tíveno claro. Ao día seguinte chameino e así empezou Os Biosbardos». O proxecto arrincou en abril do ano pasado: «A miña misión é crear un espazo de colaboración».
«Demostrar que un sistema de agricultura sostible e regenerativo é rendible». Os tres lembran que empezaron de cero nas 5 hectáreas que ocupa o proxecto: «Non había luz nin auga». Agora nos Biosbardos hai un camiño que dá a benvida aos que se queren achegar alí, un colector marítimo recuperado e convertido en almacén coas ferramentas básicas, un burrito, Telmo («o símbolo dos Biosbardos») e sete ovellas, e unha horta con produtos de tempada que venden a todos os que se achegan ata alí. «Queremos pór en valor o termo leira, integrar á xente e á contorna».