Continúa aberto en Oleiros o local de intercambio de parellas que o alcalde expuxo pechar «de inmediato»
A Coruña
García Seoane afirmou fai unha semana que o establecemento «abriu sen licenza nin autorización» e anunciou que actuaría «de inmediato»
21 ago 2019 . Actualizado ás 12:35 h.Pasou unha semana desde que o alcalde de Oleiros, Ángel García Seoane, asegurou en Facebook que a Policía Local actuaría «de inmediato» contra un local de intercambio de parellas que abriu a principios deste mes no municipio e aínda segue operando sen restricións. O rexedor escribía que «en Santa Cristina abriron un local sen licenza nin autorización, que non ten cabida no Concello de Oleiros» e sentenciaba que non ían tolerar» establecementos deste tipo.
«Os que queiran intercambiar con outras parellas teñen que ir a outro municipio», aseveraba García Seoane na rede social, pero o certo é que segundo informa Efe, o local segue aberto e funciona con normalidade.
Desde o establecemento, para evitar entrar en polémicas, declinaron facer declaracións. Na súa web descríbese o lugar como «un local íntimo e acolledor en cada un dos seus recunchos», con «preto de 200 metros destinados ao lecer e ao pracer», e aberto xoves, venres, sábados e vésperas de festivos desde as 23.30 horas. A empresa que o xestiona ten outro negocio das mesmas características en Vigo desde 2016 que funciona sen problemas.
