Terá que anulala e pagar ata 700 euros en costas xudiciais
13 dic 2018 . Actualizado ás 13:36 h.O Concello terá que anular a votación dunha moción e pagar ata 700 euros en costas xudiciais por tramitar de forma irregular a proposta, que foi aprobada por unanimidade no pleno do 10 de abril do 2017.
A moción, presentada polo BNG, reprobaba as prácticas laborais da firma Clece, que prestaba o servizo de axuda a domicilio, e apoiaba a decisión do goberno local de iniciar accións co fin de prohibirlle contratar co sector público. Tras a aprobación, Clece recorreu aos tribunais de Xustiza.
A decisión xudicial non está directamente vinculada co contido da moción, senón coa tramitación, xa que non consta «a solicitude e aprobación da mesma como urxente», polo que o maxistrado admite o recurso da compaña que denunciou a existencia dun «vicio de nulidade» no procedemento.
O peso real das mocións
A defensa do Concello argumentou que a moción non era susceptible de impugnación por non ser un «acto resolutivo». Ese argumento coincide coa postura expresada varias veces polo alcalde acerca de que as mocións carecen de peso xurídico.
Con todo, o maxistrado subliña na súa sentenza que as mocións constitúen un «acordo municipal» de «natureza resolutiva», ao contrario que os rogos e as preguntas ao goberno, que é produto dun «órgano administrativo de natureza colexiada», polo que é «plenamente fiscalizable» e non se reduce a unha «manifestación de opinión» como sostiña a defensa xudicial do Concello.
Clece manifestou a súa satisfacción polo fallo, que «demostra o doado que é desviar a atención cara ás empresas, póndoas na diana», e anunciou que destinará 1.400 euros, o dobre das costas xudiciais, á Asociación de Xóvenes Emprendedores de Lugo.