O goberno local solicitará ao Consello Consultivo a revisión dos acordos de Someso

O goberno local concluíu a instrución do procedemento de revisión de oficio dos acordos de Someso, e na actualidade está redactando unha proposta de resolución que será enviada ao Consello Consultivo para que emita un ditame respecto diso.

Así o indicou o alcalde nunha resposta á valedora do pobo, que solicitara información sobre o estado do procedemento por mor da queixa dun particular polo longo tempo que estaban levando os trámites.

A resposta do alcalde cita un informe da área de Rexeneración Urbana, da que é responsable o concelleiro Xiao Varela, no que se xustifica o atraso polo «enorme volume e a complexidade técnica e xurídica da documentación», porque requiriu a intervención de e «diferentes departamentos municipais», tamén a causa do «grande número de persoas afectadas pola tramitación do procedemento», entre outros motivos.

Os continuos atrasos do procedemento provocaron varias reclamacións á valedora do pobo, que á súa vez remitiu ao goberno local distintas queixas e advertencias de que estaba ignorando as súas obrigacións legais ao non dar resposta aos seus escritos.

Para facerse á idea do atraso, abonda dicir que a redacción do expediente iniciouse no verán do 2015, despois de que o 30 de xuño daquel ano a directora da asesoría xurídica do Concello redactase un informe no que concluía que había causas suficientes para anular os acordos previos á urbanización, o que á súa vez abriría a porta a esixir responsabilidades económicas aos cargos políticos implicados nesa operación. Para iso, sinalaba que o asunto debía ser elevado ao Consello Consultivo para que informase.

O goberno local ten previsto dar ese paso agora, cando transcorreron máis de tres anos desde a firma do citado informe.

Unha moi lenta medida urxente

O longo tempo de trámite aínda chama máis a atención se se ten en conta que a revisión dos acordos de Someso era unha das medidas «urxentes» que a Marea Atlántica se comprometeu a tomar nos primeiros cen días do mandato. Segundo o seu programa electoral, o caso dese polígono -tramitado entre os anos 2004 e 2005 polos gobernos locais do PSOE- «é paradigmático da política urbanística ao servizo da especulación, o pelotazo e os grandes promotores». É ademais un exemplo das «nefastas políticas de crecemento urbanístico insostible que herdamos do pasado, co agravante dun acreditado dano patrimonial ao Concello, estimado polos propios servizos municipais en algo máis de 19 millóns de euros».

 Esa foi a conclusión da investigación interna sobre a urbanización que se desenvolveu durante o mandato 2011-2015, baixo o goberno local do PP. Aquel expediente, instruído por funcionarios municipais, concluíu que se produciron importantes perdas patrimoniais, ademais de sementar numerosas dúbidas sobre a tramitación urbanística do polígono. Pero o informe tamén subliñaba que non era posible determinar responsabilidades individuais.

O asunto pasou pola Fiscalía e polos tribunais de Xustiza, que en todos os casos ordenaron arquivar as investigacións por considerar que non había delito.

Finalmente, tanto o anterior goberno local como o grupo municipal do BNG levaron o asunto ao Tribunal de Contas, co fin de determinar se os responsables políticos da urbanización debían sufragar co seu patrimonio as perdas económicas. Ese organismo sinalou que para culminar ese procedemento antes sería preciso anular os acordos que permitiron a urbanización mediante a súa revisión de oficio. Ese é o trámite que o goberno local iniciou no verán do 2015 e que agora, se recibe o plácet do Consello Consultivo, poderá executar.

Unha tradicional vía de ataque ao PSOE que volve a meses das municipais

As dúbidas sobre a urbanización de Someso, o chamado «caso Lóstrego» polo equipo que perdeu o seu campo de fútbol nesa urbanización, foi un dos asuntos esgrimidos primeiro polo BNG e despois polo PP para pór en dúbida a xestión dos gobernos do PSOE. A pesar de que houbo erros nos trámites, a Xustiza descartou que houbese delito e só quedou aberta a posibilidade do Tribunal de Contas. Tras máis de tres anos dun parón que xustificou pola complexidade do procedemento, o goberno local da Marea Atlántica volve agora a mover o asunto, cando apenas quedan cinco meses para unhas eleccións municipais nas que se disputará parte do seu electorado, precisamente, co PSOE.

---

---

---