A comparecencia no Congreso do maquinista do Alvia, o naufraxio dun arrastreiro de Vigo en Arxentina, a predición do tempo para a fin de semana e outras noticias que deberías saber a esta hora
12 jul 2018 . Actualizado ás 19:47 h.Foi noticia
UN MORTO E UN DESAPARECIDO NO NAUFRAXIO DUN ARRASTREIRO DE VIGO EN ARXENTINA
O arrastreiro Dorneda, con base no porto de Vigo, naufragou a pasada madrugada fronte ás costas de Arxentina, a unhas 308 millas náuticas do litoral de Comodoro Rivadavia, na Patagonia, e o sinistro deixou un falecido e un desaparecido, ambos de nacionalidade peruana. Tras o suceso, a maior parte da tripulación do buque, do que se salvaron 25 persoas, negouse a abandonar a zona ata que aparecese o compañeiro desaparecido. Todo apunta a que foron as condicións cambiantes da ondada e do vento as que causaron o accidente.
O DE ANGROIS «ERA UN ACCIDENTE ANUNCIADO», SEGUNDO O MAQUINISTA
Francisco José Garzón, o maquinista do tren sinistrado en Santiago en xullo do 2013, asegurou hoxe na comisión que investiga no Congreso o suceso que custou a vida a 80 persoas que o da curva de Angrois «era un accidente anunciado». O condutor, que se mostrou emocionado en varios momentos da súa intervención, lida inicialmente polo secretario da comisión, asegurou tamén que o Alvia carecía «de toda seguridade» que garantise a velocidade adecuada en cada tramo. Garzón volveu pedir perdón ás vítimas e a agradecerlles a súa comprensión e o seu apoio. «Prefería ter morto eu a un de eles», asegurou. Pola súa banda, o interventor do tren, que chamou por teléfono ao maquinista pouco antes do accidente, declarou que a compaña ferroviaria non impuxera ningunha restrición ao uso do móbil durante o servizo.
O PARLAMENTO DE GALICIA ESIXE Ao ESTADO QUE ABRA A VÍA XUDICIAL PARA RECUPERAR O PAZO DE MEIRÁS
O Parlamento de Galicia aprobou esta mañá por unanimidade de todos os grupos unha proposición non de lei para esixir ao Estado que abra a vía xudicial que permita a devolución ao patrimonio público do pazo de Meirás, que na actualidade está en mans da familia de Francisco Franco. Os grupos tamén coincidiron na necesidade de que a Xunta se presente no proceso e de que se recoñeza aos colectivos e persoas que loitan desde hai tempo pola memoria histórica.
A frase
Fálase de...
Relixión deixará de contar para a nota media
A ministra de Educación, Isabel Celáa, anunciou que o Goberno derrogará de forma «urxente» varios artigos da LOMCE, o que afectará, entre outras materias, á materia de relixión, que deixará de contar para a media.
O militar e o garda da Manda, en activo
O militar Alfonso Jesús Cabezuelo e o garda civil Antonio Manuel Guerrero , membros da Manda, pasaron á situación de activo, tras seis meses de suspensión. O Goberno asegura que non lles dará destino.
Aos lectores tamén lles interesou
