A Compaña de María e o Valle-Inclán súmanse a unha plataforma nacional para fomentar a igualdade na ciencia
12 feb 2019 . Actualizado ás 05:00 h.Inventos tan revolucionarios como os cueiros, o limpaparabrisas ou o material do que están feitos os chalecos antibalas levan selo feminino (en concreto, o de Marion Donovan, Mary Anderson e Stephanie Kwolek). E tamén a unha muller, Rosalind Franklin, débese en gran parte o descubrimento da estrutura do ADN, aínda que ninguén se acordou dela cando anos máis tarde, tras a súa morte, tres colegas de investigación -os tres homes-levaron todo o mérito ao recibir o Nobel de Fisiología e Medicina por aquel achado científico sen precedentes.
A moitas veces silenciada labor destas e outras moitas mulleres científicas -algunhas delas, ferrolás- acaparou onte o protagonismo nos colexios Compaña de María e Valle-Inclán, co gallo da conmemoración do 11 de febreiro, Día Internacional da Muller e a Nena na Ciencia. Tras presentar senllos proxectos, estes dous centros ferroláns foron seleccionados este ano, xunto a outros moitos colexios e institutos de España, para formar parte da plataforma 11 de Febreiro, un colectivo integrado por investigadores e docentes -homes e mulleres- que loitan por romper a fenda de xénero no ámbito científico. E grazas á súa inclusión no «mapa de centros» desa plataforma, tanto no Valle-Inclán como na Compaña de María púidose vivir onte un 11 de febreiro dunha forma moi intensa, con charlas a cargo de científicas, exposicións, experimentos e outras actividades que, nalgúns casos, terán continuidade ao longo desta semana.
No Valle-Inclán, por exemplo, os estudantes puideron escoitar a unha ex alumna, María Isabel Rial Hermida, que hoxe traballa como investigadora no departamento de Farmacoloxía da Universidade de Santiago de Compostela. «Aos nenos expliqueilles que si, que a fenda de xénero segue existindo na ciencia, pero tamén que, por fortuna, esta situación está a cambiar», apuntaba Rial tras visitar o seu antigo colexio, onde falou aos rapaces do seu traballo e deixounos pampos cun experimento no que lles mostrou como inchar un globo co CO2 obtido da mestura de vinagre e bicarbonato.
Mentres, na Compaña de María, os estudantes de secundaria tamén puideron escoitar a outras dúas científicas ferrolás: María García Garrote, unha neurobióloga dedicada á investigación do Parkinson, e Luz Castro, informática e profesora do máster de videoxogos da Universidade da Coruña (UDC).
«Houbo algo que me chamou moito a atención e é que cando Garrote preguntoulles a cantos lles gustaría dedicarse á ciencia no futuro, houbo unha chea de nenos que levantaron a man, pero, entre as nenas, só o fixeron tres. Por que? Pois porque seguramente en casa a elas non llas anima tanto como a eles a estudar ciencias e os estereotipos seguen pesando demasiado», comenta Ángel Fernández Romero , director da Compaña e responsable do Club de Ciencias do centro.
Ademais, os nenos de Infantil participaron nun xogo para coñecer a mulleres inventoras, mentres que os de Primaria elaboraron traballos en grupos sobre científicas destacadas, e hoxe mesmo participarán nun xogo de rol para descubrir máis cousas sobre o seu traballo. E por se iso fose pouco, a Compaña acolle estes días unha exposición sobre mulleres científicas, aberta a todo o mundo, que recalou no colexio da man da Oficina de Igualdade de Xénero da UDC e da Asociación Española de Mulleres Investigadoras e Tecnólogas (AMIT).