Con Manu Barreiro xa son nove os xogadores lesionados para recibir ao Xirona
04 oct 2021 . Actualizado ás 20:51 h.Lonxe de aliviarse, a praga de lesións que azouta ao Lugo crece co paso dos partidos. O atasco na súa enfermería é maior tras a visita ao campo de Butarque, onde o equipo albivermello rascou un punto logo de perder ao seu dianteiro de referencia pouco antes do descanso. Nun lance preto da zona dos bancos, Manu Barreiro recibiu un forte golpe no nocello por parte do central do Leganés Kenneth Omeruo e abandonou o terreo de xogo con claros xestos de dor. Desde o club sinalaron que haberá que agardar ás análises médicas para coñecer a gravidade da lesión, aínda que gardan poucas esperanzas de que o dianteiro santiagués poida estar dispoñible para o encontro do próximo sábado ante o Xirona, que arrincará ás 16.00 horas no Anxo Carro.
Se finalmente se confirma a súa ausencia, a lista de baixas por lesión para este encontro comporíana nove futbolistas, posto que á conclusión deste último compromiso Rubén Albés, o preparador do conxunto lucense, xa avanzou que hai moi poucas posibilidades de recuperar a algún dos xogadores que xa non puideron estar en Butarque por problemas físicos: Juanpe, Alberto Rodríguez, Sebas Moyano, Pedro López, David Mayoral, Carlos Pita, Óscar Whalley e Álex Pérez. Os catro primeiros aínda non se estrearon na presente tempada e Álex Pérez non puido xogar máis que sete minutos no partido da cuarta xornada ante o Fuenlabrada.
A esta gran cantidade de baixas hai que sumar a de Jaume Cuéllar, que foi convocado pola selección boliviana para tres compromisos da fase de clasificación para o Mundial que se celebrará en Catar. O dianteiro do conxunto albivermello concentrarase nos próximos días coa súa selección para os encontros fronte a Ecuador, este venres, Perú, o domingo 10, e Paraguai, previsto para o vindeiro xoves 14.
Á venda as entradas para para a cita solidaria do sábado
No despacho de billetes en liña habilitado na web de club xa están á venda as entradas para o encontro do sábado fronte ao Xirona. Desde a entidade levan días animando ao público para que acuda ao Anxo Carro e non só porque o equipo lle necesita, senón tamén polo carácter solidario do encontro. Cabe lembrar que o Lugo decidiu doar a recadación íntegra do encontro aos afectados polo volcán da Palma. Os socios non pasarán por despacho de billetes, pero poderán comprar entradas cun 50 % de desconto. Ademais, o persoal branquivermello doou as súas camisetas oficiais para unha poxa solidaria que se celebrará pola causa.