Os canarios Herrera e Iriome sacaron ao Lugo da seca ante o Córdoba
26 novs 2018 . Actualizado ás 05:00 h.A dinamita dos canarios do Lugo volve funcionar. O ano pasado, os goles de Cristian Herrera (As Palmas, 1991) e Iriome González (Icod de los Vinos, 1987) supuxeron máis do 30 % dos que meteu todo o equipo. Sete do punta canarión, cinco do extremo tinerfeño. Unha ducia de goles con denominación de orixe dos 39 que foi capaz de anotar o Lugo de Francisco. Este ano manteñen as súas cifras nas primeiras 15 xornadas. Das 13 dianas que cultivou o seu equipo, catro levan o selo das Illas Afortunadas. Os dous últimos foron vitais para superar ao Córdoba o sábado (2-1).
«Para calquera de nós é un plus de confianza persoal axudar ao equipo con goles», di Iriome sobre o tanto que redondeou o marcador na primeira parte (2-0). Explica que «foi grazas a un centro bo de Luis [Ruiz], raso, forte que creo que debido a esa forza non a bloca Carlos e o rexeite, estou aí preto para que entrase». Abriu o melón Cristian Herrera de penalti, que explica que «tiña claro desde un principio» por onde ía tirar. «Saíu todo ben e era importante para o equipo, pórnos por diante, quitarnos un pouco esa presión por marcar o primeiro gol», relata o protagonista.
Iriome está convencido de que «o equipo o necesitaba, estaba tranquilo, pero para conseguir esa confianza que necesitaba. Talvez nos últimos partidos había cousas que nos facían ser optimistas co traballo, pero os resultados non chegaban». A chegada de Alberto Monteagudo ao banco do Lugo traduciuse en mellores sensacións nalgúns partidos, pero a falta de gol lastrara aos branquivermellos máis xornadas das debidas. «Desde que veu o novo míster notouse un gran cambio. Sobre todo en actitude», valora Herrera.
O dianteiro das Palmas traballou incansable por toda a fronte de ataque e rise cando lle preguntan polos quilómetros que fixo o sábado: «Non o sei, pero valeu a pena. Coa vitoria do equipo todo sabe mellor».
Ten claro Iriome que o Lugo xogou menos ao toque contra os andaluces e que sufriron na segunda parte. Sorrí lacónico se pensa que gañaron sendo o «anti-Lugo» e resolve con elegancia: «O equipo estivo acertado e quero quedar cos tres puntos polo rival que tiñamos e no momento no que estabamos é importante. Quero quedar con iso e con todo o traballo dos meus compañeiros». Conseguiron a vitoria con pouca chegada e moita puntería, como en ocasións anteriores fixeran os seus rivais para arrincarlles os tres puntos (foi o caso do Alcorcón) e o tinerfeño apunta que «estivemos acertados nesa faceta do xogo e son cousas que dan puntos. Outras veces o equipo xera ocasións, pero non acaban de entrar e chega o rival e méteche unha e quedas con cara de bobo».
Se algo amarga a vitoria contra os de Curro Torres foron as sensacións da segunda parte, na que o seu rival mereceu máis por dominio da pelota e ocasións. «Nós tiñamos a idea, despois dos 45, de saír a lume de biqueira os primeiros 10 ou 15 minutos, pero eles saíron así e tiveron as oportunidades, ese gol e ao final tócache traballar o dobre», valora Iriome. Coincide coa súa análise o dianteiro canario, que sinala que «na segunda parte eles saíron máis a por o partido e foi cando chegou o seu gol». «Houbo varios arreones. É algo que hai que mellorar, non meternos tanto atrás cando imos por diante», di autocrítico.
Descanso, mañá
Hoxe o Lugo traballará ás 10.45 horas no campo do Ceao e o día de descanso semanal será mañá. Xa coa vista posta no Osasuna (domingo, 16.00 horas), aos que visitarán a próxima fin de semana, di Iriome que é «un campo difícil, rival difícil, pero hai que competir en todos lados. Esta vitoria é unha ayudita para seguir crendo no traballo diario».