Tería que haber 19, e xa que logo hai 15, segundo os cálculos que realiza a entidade Monte Faro
16 abr 2021 . Actualizado ás 09:26 h.Os lobos mataron catro poldros nos montes de Vimianzo en pouco máis dunha semana. Tres deles, entre o venres e o luns, e o outro, con anterioridade. Tería que haber 19, e xa que logo hai 15, segundo os cálculos (e os controis) que realiza a entidade Monte Faro, que está recuperando a cabana equina na zona.
En concreto, teñen agora 135 cabezas, segundo explica o presidente do colectivo, Adrián Martínez Oreiro. «É o maior número en moito tempo», froito dun traballo que se estende non só pola contorna do monte Faro, senón nos arredores, como os de Carantoña. Precisamente nesta parroquia, nas proximidades da Casa do Prado, foi onde ocorreron a maioría das mortes.
Unha delas, ademais, de día. Martínez non lembra tantos ataques en tan breve lapso de tempo, aínda que si sabe de dúas mortes o mesmo día fará uns dous anos. En todo caso, noutros tempos, eses sucesos si tiñan máis frecuencia, especialmente na zona do Peón. Moito cambiou a xestión e a poboación do gando equino desde entón, incluída a recuperación de rápaa que este ano está, de novo, en moitas dúbidas de que se celebre.